तासवडे एमआयडीसीतील केमिकल कंपनीत भीषण स्फोट; आगीमुळे परिसर हादरला, नागरिकांमध्ये भीतीचे वातावरण

तासवडे एमआयडीसीतील केमिकल कंपनीत भीषण स्फोट; आगीमुळे परिसर हादरला, नागरिकांमध्ये भीतीचे वातावरण

सातारा प्रतिनिधी : 

सातारा जिल्ह्यातील तासवडे एमआयडीसी परिसरात सोमवारी (दि. ३० मार्च २०२६) सकाळी सुमारे साडे आठ वाजण्याच्या सुमारास एका केमिकल कंपनीत भीषण स्फोट होऊन मोठी आग लागल्याची धक्कादायक घटना घडली. या स्फोटामुळे संपूर्ण परिसर हादरून गेला असून नागरिकांमध्ये भीतीचे वातावरण निर्माण झाले आहे.

ही घटना एसकेएस फाईन केम (SKS Fine Chem) या कंपनीच्या प्लॉट क्रमांक बी-१ (४७) येथे घडली. प्राथमिक माहितीनुसार, “एम्ब्रोजिल बेस” नावाच्या रसायनाचे बॅरल्स अचानक फुटल्याने हा स्फोट झाला. स्फोटानंतर मोठ्या प्रमाणावर आग लागली आणि काळ्या धुराचे प्रचंड लोट आकाशात पसरले. या धुरामुळे एमआयडीसीसह आसपासच्या परिसरात काही काळ दाट धुक्यासारखी परिस्थिती निर्माण झाली.

स्फोटानंतरही सकाळी दहा वाजेपर्यंत अधूनमधून छोटे-मोठे स्फोट होत असल्याची माहिती प्रत्यक्षदर्शींनी दिली. त्यामुळे बचावकार्याला अडथळे निर्माण झाले. घटनास्थळी तातडीने अग्निशमन दलाच्या गाड्या दाखल झाल्या असून आगीवर नियंत्रण मिळवण्यासाठी शर्थीचे प्रयत्न सुरू आहेत. पोलिस आणि आपत्कालीन यंत्रणाही घटनास्थळी दाखल झाल्या असून संपूर्ण परिसर बंदोबस्ताखाली ठेवण्यात आला आहे.

या घटनेत नेमके किती नुकसान झाले किंवा जीवितहानी झाली आहे का, याबाबत अद्याप अधिकृत माहिती मिळालेली नाही. मात्र, स्फोटाच्या तीव्रतेमुळे कंपनीतील यंत्रसामग्रीचे मोठे नुकसान झाल्याची शक्यता वर्तवली जात आहे.

सुरक्षेच्या दृष्टीने प्रशासनाने परिसरातील नागरिकांना सावध राहण्याचे आवाहन केले असून अनावश्यक गर्दी टाळण्याचे निर्देश दिले आहेत. तसेच या घटनेमागील नेमके कारण शोधण्यासाठी संबंधित विभागाकडून चौकशी सुरू करण्यात आली आहे.

दरम्यान, औद्योगिक क्षेत्रात वारंवार घडणाऱ्या अशा दुर्घटनांमुळे सुरक्षाव्यवस्थेवर प्रश्नचिन्ह उपस्थित होत असून एमआयडीसीतील केमिकल कंपन्यांमध्ये सुरक्षा नियमांचे काटेकोर पालन होत आहे का, याबाबतही चर्चा सुरू झाली आहे.