इंधन पुरवठा सुरळीत ठेवण्यासाठी खंडाळा तहसील कार्यालयात नियंत्रण कक्ष स्थापन; अफवांवर विश्वास न ठेवण्याचे प्रशासनाचे आवाहन

इंधन पुरवठा सुरळीत ठेवण्यासाठी खंडाळा तहसील कार्यालयात नियंत्रण कक्ष स्थापन; अफवांवर विश्वास न ठेवण्याचे प्रशासनाचे आवाहन

खंडाळा प्रतिनिधी : 

जागतिक पातळीवर निर्माण झालेल्या परिस्थितीमुळे इंधन पुरवठा साखळीवर ताण येण्याची शक्यता लक्षात घेता नागरिकांना पेट्रोल, डिझेल आणि एलपीजी गॅसचा पुरवठा सुरळीत राहावा यासाठी खंडाळा तहसील प्रशासनाने महत्त्वाचे पाऊल उचलले आहे. संभाव्य तुटवडा किंवा अफवांमुळे होणारी अनावश्यक गर्दी टाळण्यासाठी खंडाळा तहसील कार्यालयात तालुका स्तरावर नियंत्रण कक्ष (कंट्रोल रूम) स्थापन करण्यात आला आहे.

प्रशासनाकडून मिळालेल्या माहितीनुसार, सध्या जागतिक परिस्थितीमुळे काही ठिकाणी नागरिकांमध्ये इंधनाबाबत भीतीचे वातावरण निर्माण होत आहे. परिणामी काही ठिकाणी नागरिक अतिरिक्त साठा करून ठेवण्याचा प्रयत्न करतात. अशा प्रकारच्या कृतीमुळे प्रत्यक्षात कृत्रिम टंचाई निर्माण होण्याची शक्यता असते. ही परिस्थिती टाळण्यासाठी तसेच इंधन वितरण प्रक्रियेत पारदर्शकता राखण्यासाठी तालुका पुरवठा शाखेच्या माध्यमातून हा नियंत्रण कक्ष सुरू करण्यात आला आहे.

या नियंत्रण कक्षाच्या माध्यमातून खंडाळा तालुक्यातील पेट्रोल, डिझेल आणि एलपीजी गॅसच्या उपलब्धतेबाबतची माहिती नागरिकांना देण्यात येणार असून कोणत्याही अडचणी किंवा तक्रारी असल्यास त्यांचे निराकरण करण्यासाठी प्रशासन तत्पर राहणार आहे. नागरिकांनी घाबरून अनावश्यक साठा न करता संयम बाळगावा आणि इंधनाचा वापर गरजेपुरता करावा, असे आवाहनही प्रशासनाकडून करण्यात आले आहे.

अधिकृत माहिती मिळविण्यासाठी किंवा इंधन पुरवठ्याबाबत मदत हवी असल्यास नागरिकांनी कार्यालयीन वेळेत सकाळी ९.४५ ते संध्याकाळी ६.१५ या वेळेत ७४४८००७०१७ या दूरध्वनी क्रमांकावर संपर्क साधावा, असेही तहसील प्रशासनाने कळविले आहे.

या उपक्रमामुळे इंधन वितरण व्यवस्थेवर लक्ष ठेवणे सुलभ होणार असून तालुक्यातील नागरिकांना इंधनाचा पुरवठा नियमितपणे मिळण्यासाठी प्रशासनाने खबरदारीची पावले उचलल्याचे सांगण्यात आले आहे.