महाबळेश्वर तालुक्यातील ज्येष्ठ धार्मिक व्यक्तिमत्व ह.भ.प. किसन धोंडू धामुणसे यांचे निधन; दुधोशी गावावर शोककळा

महाबळेश्वर तालुक्यातील ज्येष्ठ धार्मिक व्यक्तिमत्व ह.भ.प. किसन धोंडू धामुणसे यांचे निधन; दुधोशी गावावर शोककळा

दुधोशी  प्रतिनिधी :

महाबळेश्वर तालुक्यातील दुधोशी येथील रहिवासी तसेच धार्मिक व आध्यात्मिक क्षेत्रातील आदरणीय व्यक्तिमत्व ह.भ.प. किसन धोंडू धामुणसे यांचे रविवारी, दिनांक १ फेब्रुवारी २०२६ रोजी वृद्धापकाळाने निधन झाले. त्यांच्या निधनाने धामुणसे परिवारासह दुधोशी गावावर आणि पंचक्रोशीतील भाविकांवर शोककळा पसरली आहे.

किसन धामुणसे हे अत्यंत साधे जीवन जगणारे, धार्मिक प्रवृत्तीचे आणि परोपकारी स्वभावाचे व्यक्तिमत्व म्हणून ओळखले जात होते. गावातील धार्मिक कार्यक्रम, कीर्तन, सामाजिक उपक्रम तसेच अडचणीत असलेल्या नागरिकांना मदतीचा हात देण्यात त्यांचा नेहमीच पुढाकार असायचा. त्यांच्या वाणीतील संयम, आचरणातील शिस्त आणि समाजासाठीची तळमळ यामुळे त्यांना सर्वत्र मान-सन्मान प्राप्त झाला होता. त्यांच्या मार्गदर्शनामुळे अनेकांनी धार्मिक आणि सुसंस्कृत जीवनाची वाट धरल्याची भावना ग्रामस्थ व्यक्त करत आहेत.

त्यांच्या पश्चात मुले, मुली, पुतणे, नातवंडे असा मोठा परिवार आहे. संजय किसन धामुणसे आणि विजय किसन धामुणसे हे त्यांचे पुत्र असून लक्ष्मण यशवंत धामुणसे, मधुकर बबन धामुणसे व सुधाकर बबन धामुणसे हे पुतणे आहेत. कमल बाजीराव कदम, शशिकला पांडुरंग झाडे आणि आशा संजय सावंत या त्यांच्या कन्या आहेत. समस्त धामुणसे परिवारावर या दुःखद घटनेने मोठा आघात झाला असून गावकऱ्यांकडून कुटुंबीयांचे सांत्वन केले जात आहे.

दिवंगत किसन धामुणसे यांच्या आत्म्यास शांती लाभावी यासाठी होणारे उत्तरक्रिया विधी मंगळवार, दिनांक १० फेब्रुवारी २०२६ रोजी दुधोशी, ता. महाबळेश्वर येथे पार पडणार आहेत. त्यांच्या निधनाने समाजातील एक मार्गदर्शक, श्रद्धास्थान आणि आधारवड हरपल्याची भावना सर्व स्तरांतून व्यक्त होत असून, त्यांच्या आठवणी कायम स्मरणात राहतील, असे मत ग्रामस्थांनी व्यक्त केले आहे.