संत रोहिदास महाराज चर्मकार पथारी संघटनेची नवी कार्यकारिणी जाहीर; समाजहितासाठी लढणारे आक्रमक नेतृत्व पुढे

संत रोहिदास महाराज चर्मकार पथारी संघटनेची नवी कार्यकारिणी जाहीर; समाजहितासाठी लढणारे आक्रमक नेतृत्व पुढे

✍️मिलिंद काळे,

महाबळेश्वर | प्रतिनिधी
संत रोहिदास महाराज चर्मकार पथारी संघटनेच्या नव्या कार्यकारिणीची अधिकृत घोषणा नुकतीच करण्यात आली. चर्मकार समाजाच्या हक्कांसाठी, पथारी व्यवसायिकांच्या न्याय्य मागण्यांसाठी तसेच अन्यायाविरोधात ठामपणे संघर्ष करणारे नवे नेतृत्व या निमित्ताने पुढे आले आहे. संघटनेच्या अध्यक्षपदी अतुल साळुंखे यांची निवड करण्यात आली असून, उपाध्यक्षपदी उमेश काळे, सचिवपदी विक्रम सोनावणे तर खजिनदारपदी शशिकांत कारंडे यांची नियुक्ती करण्यात आली आहे. यासोबतच संघटनेच्या कार्यकारिणी सदस्य म्हणून मिलिंद काळे आणि मिथलेश कानडे यांची निवड करण्यात आली आहे.

नव्या कार्यकारिणीच्या घोषणेनंतर संघटनेच्या पुढील वाटचालीबाबत स्पष्ट भूमिका मांडण्यात आली. पथारी व्यवसाय करणाऱ्या चर्मकार बांधवांना भेडसावणाऱ्या जागा, परवाने, पुनर्वसन, अतिक्रमण कारवाईतील अन्याय, तसेच शिक्षण व रोजगाराच्या संधी यांसारख्या ज्वलंत प्रश्नांवर संघटितपणे आवाज उठवणे, गरज पडल्यास रस्त्यावर उतरून तीव्र आंदोलन छेडणे आणि प्रशासनाला ठोस निर्णय घेण्यास भाग पाडणे, हा नव्या कार्यकारिणीचा ठाम निर्धार असल्याचे पदाधिकाऱ्यांनी सांगितले.

संत रोहिदास महाराजांच्या समता, बंधुता, न्याय आणि स्वाभिमानाच्या विचारांवर चालत चर्मकार समाजाला हक्क, सन्मान व सुरक्षित भविष्य मिळवून देण्यासाठी संघटना अधिक आक्रमक, संघटित आणि परिणामकारक भूमिका घेणार असल्याचे यावेळी स्पष्ट करण्यात आले. समाजातील तरुणांना संघटनेच्या कार्यात सक्रियपणे सहभागी करून घेत त्यांच्या नेतृत्व क्षमतेला वाव देण्यावरही विशेष भर देण्यात येणार असल्याचे सांगण्यात आले.

नव्या नेतृत्वामुळे संघटनेच्या कार्याला नवी गती मिळेल, पथारी व्यवसायिकांच्या प्रश्नांना प्रभावी व्यासपीठ मिळेल आणि चर्मकार समाजाच्या दीर्घकाळ प्रलंबित मागण्यांना न्याय मिळवून देण्यासाठी एकसंघ लढा उभा राहील, असा विश्वास समाजबांधवांकडून व्यक्त करण्यात येत आहे.