बिग ब्रेकिंग : मेट गुताड गणात राष्ट्रवादी काँग्रेसचा झेंडा – शकुंतला चोरमले दणदणीत विजयी
महाबळेश्वर प्रतिनिधी
महाबळेश्वर तालुक्यातील मेट गुताड गणाचा पंचायत समितीचा अंतिम निकाल जाहीर झाला असून राष्ट्रवादी काँग्रेसच्या उमेदवार शकुंतला चोरमले यांनी दणदणीत विजय मिळवला आहे. अत्यंत चुरशीच्या झालेल्या या लढतीत शकुंतला चोरमले यांनी प्रतिस्पर्ध्यांवर निर्णायक आघाडी घेत विजय निश्चित केला.
अंतिम मतमोजणीनुसार राष्ट्रवादी काँग्रेसच्या शकुंतला चोरमले यांना एकूण 2784 मते मिळाली आहेत. शिवसेना शिंदे गटाच्या वैशाली जाधव यांना 1655 मते मिळाली असून भाजपच्या अमीना श्रावण यांना 1698 मते मिळाली आहेत. तिरंगी लढतीत शकुंतला चोरमले यांनी भाजपच्या अमीना श्रावण यांच्यावर सुमारे 1086 मतांची, तर शिवसेनेच्या वैशाली जाधव यांच्यावर सुमारे 1129 मतांची स्पष्ट आघाडी घेत विजय संपादन केला.
संपूर्ण मतमोजणीदरम्यान मेट गुताड गणात प्रचंड उत्सुकता निर्माण झाली होती. प्रत्येक फेरीसोबत लढत रंगतदार होत गेली, मात्र अंतिम टप्प्यात राष्ट्रवादी काँग्रेसच्या शकुंतला चोरमले यांनी आघाडी अधिक मजबूत करत बाजी मारली. निकाल जाहीर होताच राष्ट्रवादी कार्यकर्त्यांमध्ये आनंदाचे वातावरण निर्माण झाले असून फटाके फोडून, घोषणा देत आणि एकमेकांना शुभेच्छा देत जल्लोष करण्यात आला.
या विजयामुळे महाबळेश्वर तालुक्यातील पंचायत समितीतील राजकीय समीकरणांवर राष्ट्रवादी काँग्रेसचा प्रभाव अधिक बळकट झाला असून आगामी सत्तास्थापनेत या निकालाची महत्त्वपूर्ण भूमिका राहणार आहे.
Comments
Post a Comment