कुंभरोशी गावावर शोककळा; ग्रामपंचायत कर्मचारी सतीश सावंत यांचा अकस्मात मृत्यू
कुंभरोशी प्रतिनिधी –
कुंभरोशी गावचे युवक व ग्रामपंचायतमध्ये शिपाई म्हणून कार्यरत असलेले सतीश सावंत यांचे अकस्मात निधन झाल्याने संपूर्ण गावावर शोककळा पसरली आहे. अत्यंत मनमिळावू स्वभाव, कर्तव्यनिष्ठा आणि प्रामाणिक सेवेसाठी परिचित असलेले सतीश सावंत यांच्या अचानक जाण्याने गावकऱ्यांना मोठा धक्का बसला आहे.
ग्रामपंचायत कार्यालयातील दैनंदिन कामकाजात ते नेहमीच तत्परतेने जबाबदारी पार पाडत असत. स्वच्छता, कागदपत्रांची ने-आण, तसेच कार्यालयीन कामात त्यांची उपस्थिती ग्रामस्थांना नेहमीच आधार देणारी होती. त्यांच्या सेवाभावी वृत्तीमुळे कर्मचारी वर्गासह ग्रामस्थांमध्येही त्यांच्याबद्दल आदर होता.
त्यांच्या पश्चात पत्नी, तीन मुली आणि एक मुलगा असा परिवार असून घरातील कर्ता पुरुष अचानक हरपल्याने कुटुंबावर दुःखाचा डोंगर कोसळला आहे. आर्थिक व भावनिकदृष्ट्या अत्यंत कठीण परिस्थितीत हे कुटुंब सापडले असून त्यांच्या भवितव्याबाबत सर्वत्र हळहळ व्यक्त केली जात आहे.
या दुःखद घटनेनंतर ग्रामपंचायत सदस्य, कर्मचारी, तसेच गावातील विविध स्तरातील नागरिकांनी सतीश सावंत यांच्या निवासस्थानी भेट देत श्रद्धांजली अर्पण केली. त्यांच्या अकाली जाण्याने निर्माण झालेली पोकळी कधीही न भरून निघणारी असल्याची भावना ग्रामस्थांकडून व्यक्त होत आहे.
ईश्वर दिवंगत आत्म्यास शांती देवो व त्यांच्या कुटुंबाला हे दुःख सहन करण्याचे बळ देवो, अशी प्रार्थना सर्वत्र व्यक्त केली जात आहे.
Comments
Post a Comment