३६ हजारांहून अधिक मतदारांसह महाबळेश्वर तालुका निवडणुकीसाठी सज्ज; १०९ मतदान केंद्रांवर होणार मतदान

३६ हजारांहून अधिक मतदारांसह महाबळेश्वर तालुका निवडणुकीसाठी सज्ज; १०९ मतदान केंद्रांवर होणार मतदान

महाबळेश्वर प्रतिनिधी –

महाबळेश्वर तालुक्यातील जिल्हा परिषद व पंचायत समितीच्या २०२६ सालातील आगामी सार्वत्रिक निवडणुकांसाठी प्रशासनाने सर्व तयारी पूर्ण केली असून तालुक्याची अंतिम मतदार यादी आणि निवडणूक नियोजनाचा सविस्तर आराखडा जाहीर करण्यात आला आहे. या निवडणुकीसाठी तालुक्यात एकूण ३६,२५७ मतदार नोंदणीकृत असून लोकशाहीच्या या प्रक्रियेत सहभागी होण्यासाठी संपूर्ण यंत्रणा सज्ज झाली आहे.

प्रशासनाकडून जाहीर करण्यात आलेल्या आकडेवारीनुसार, तालुक्यात १८,५५४ पुरुष मतदार आणि १७,७०३ स्त्री मतदार आहेत. यंदाच्या यादीत ‘इतर’ प्रवर्गातील एकही मतदार नोंदलेला नाही. पुरुष मतदारांची संख्या तुलनेने अधिक असली तरी स्त्री मतदारांची उपस्थितीही लक्षणीय असल्याचे चित्र आहे.

गटनिहाय पाहता, ३४ क्रमांकाच्या तळदेव गटात एकूण १७,५२५ मतदार असून या गटात कुंभरोशी गणातील ७,७७४ आणि तळदेव गणातील ९,७५१ मतदारांचा समावेश आहे. तर ३५ क्रमांकाच्या भिलार गटात एकूण १८,७३२ मतदार असून त्यामध्ये मेटगुताड गणातील ८,४२६ आणि भिलार गणातील १०,३०६ मतदार नोंदणीकृत आहेत. दोन्ही गटांतील मतदारसंख्या जवळपास समसमान असल्याने यंदाची निवडणूक चुरशीची ठरण्याची शक्यता व्यक्त केली जात आहे.

मतदान प्रक्रिया सुलभ आणि सुरळीत पार पडावी यासाठी तालुक्यात एकूण १०९ मतदान केंद्रे निश्चित करण्यात आली आहेत. तळदेव गटांतर्गत ५१ ग्रामपंचायतींमधील ७३ गावांचा समावेश असून या भागासाठी ७० मतदान केंद्रांची उभारणी करण्यात आली आहे. भिलार गटात २८ ग्रामपंचायतींतील ३८ गावांचा समावेश असून तेथे ३९ मतदान केंद्रांवर मतदान होणार आहे. दुर्गम आणि डोंगराळ भागांचा विचार करून मतदारांना दूर अंतर पार करावे लागू नये यासाठी ही केंद्ररचना करण्यात आल्याचे प्रशासनाने स्पष्ट केले आहे.

निवडणूक प्रक्रिया पार पाडण्यासाठी मनुष्यबळाचे काटेकोर नियोजन करण्यात आले असून एकूण ६०० कर्मचाऱ्यांची नियुक्ती करण्यात आली आहे. यामध्ये १२० मतदान केंद्राध्यक्ष, प्रत्येकी १२० असे एकूण ३६० मतदान अधिकारी (१, २ व ३) आणि १२० शिपायांचा समावेश आहे. कोणत्याही अडचणीच्या वेळी पर्यायी व्यवस्था उपलब्ध राहावी यासाठी १० टक्के कर्मचारी राखीव ठेवण्यात आले आहेत. तसेच संपूर्ण प्रक्रियेवर देखरेख ठेवण्यासाठी २७ क्षेत्रीय अधिकाऱ्यांची नियुक्ती करण्यात आली असून त्यात २४ मुख्य आणि ३ राखीव अधिकाऱ्यांचा समावेश आहे.

महाबळेश्वर तालुक्यातील भौगोलिक परिस्थिती आणि गावांची रचना लक्षात घेता, मतदानाचा हक्क प्रत्येक मतदाराला सहजतेने बजावता यावा हा प्रशासनाचा मुख्य उद्देश आहे. निवडणूक प्रक्रिया पारदर्शक, शांततेत आणि लोकशाही मूल्यांना साजेशी व्हावी यासाठी सर्व खबरदारी घेतली जात असून, मतदारांनी मोठ्या संख्येने मतदानासाठी बाहेर पडून लोकशाहीच्या या उत्सवात सक्रिय सहभाग घ्यावा, असे आवाहन प्रशासनाच्या वतीने करण्यात आले आहे.