रस्त्यासाठी अखेर ग्रामस्थांचा कडक इशारा; मुकवली–मुरा धनगरवाडीत निवडणूक बहिष्कार व कर न भरण्याचा एकमुखी निर्णय

रस्त्यासाठी अखेर ग्रामस्थांचा कडक इशारा; मुकवली–मुरा धनगरवाडीत निवडणूक बहिष्कार व कर न भरण्याचा एकमुखी निर्णय

महाबळेश्वर प्रतिनिधी –

मुकवली–मुरा धनगरवाडी परिसरात मागील अनेक वर्षांपासून नागरिकांच्या दैनंदिन ये-जा करण्यासाठी सुसज्ज रस्त्याची कोणतीही ठोस सोय नसल्याने ग्रामस्थांचे हाल वाढले आहेत. या गंभीर समस्येकडे प्रशासन आणि लोकप्रतिनिधींचे लक्ष वेधण्यासाठी येथील नागरिकांनी वेळोवेळी सातत्याने पाठपुरावा केला. मात्र प्रत्येक निवडणुकीत केवळ आश्वासनांचीच बरसात झाली आणि प्रत्यक्षात रस्त्याच्या कामाबाबत कोणतीही ठोस कारवाई न झाल्याने ग्रामस्थांमध्ये तीव्र नाराजी व्यक्त होत आहे.

सतत विकासाच्या गप्पा मारणाऱ्या नेत्यांनी प्रत्यक्षात एकदा तरी या परिसरात येऊन वस्तुस्थिती पाहावी, अशी ठाम मागणी ग्रामस्थांकडून केली जात आहे. विशेषतः पावसाळ्यात रस्त्याअभावी नागरिकांना जीव मुठीत धरून तारेवरची कसरत करत प्रवास करावा लागतो. चिखल, घसरगुंडी आणि अरुंद वाटांमुळे अनेकदा अपघाताची भीती कायम असते. या परिस्थितीचा सर्वाधिक फटका रुग्ण, शालेय विद्यार्थी, वृद्ध नागरिक आणि महिलांना सहन करावा लागत असून दैनंदिन जीवन अक्षरशः विस्कळीत झाले आहे.

या दीर्घकाळ चाललेल्या दुर्लक्षाला कंटाळून अखेर ग्रामस्थांनी एक कठोर आणि आंदोलनात्मक निर्णय घेतला आहे. जोपर्यंत रस्त्याचे प्रत्यक्ष काम सुरू होत नाही, तोपर्यंत ग्रामपंचायतीच्या येणाऱ्या प्रत्येक निवडणुकीवर बहिष्कार टाकण्याचा तसेच घरपट्टी, पाणीपट्टी यांसारखा वार्षिक महसूल न भरण्याचा निर्णय ग्रामस्थांनी एकमताने घेतला आहे. हा निर्णय केवळ नाराजी व्यक्त करण्यापुरता नसून, प्रशासनाचे लक्ष वेधण्यासाठी दिलेला थेट इशारा असल्याचे ग्रामस्थांचे म्हणणे आहे.

या ठाम निर्णयानंतर शासन दरबारी आणि संबंधित प्रशासनाकडून नेमकी कोणती भूमिका घेतली जाते, याकडे संपूर्ण परिसराचे लक्ष लागले आहे. ग्रामस्थांचा हा संयमी पण ठोस इशारा प्रशासनासाठी डोळे उघडणारा ठरेल आणि वर्षानुवर्षे रखडलेली रस्त्याची मागणी अखेर मार्गी लागेल, अशी अपेक्षा नागरिकांकडून व्यक्त केली जात आहे.