कुंभरोशीमध्ये अजित पवार यांना भावपूर्ण श्रद्धांजली; ग्रामस्थांसह राष्ट्रवादी काँग्रेस नेत्यांची मोठी उपस्थिती

कुंभरोशीमध्ये अजित पवार यांना भावपूर्ण श्रद्धांजली; ग्रामस्थांसह राष्ट्रवादी काँग्रेस नेत्यांची मोठी उपस्थिती

कुंभरोशी प्रतिनिधी –

कुंभरोशी येथे उपमुख्यमंत्री अजित पवार यांच्या निधनाबद्दल ग्रामस्थ आणि राष्ट्रवादी काँग्रेसच्या नेत्यांनी एकत्र येत भावपूर्ण श्रद्धांजली अर्पण केली. गावात आयोजित करण्यात आलेल्या या श्रद्धांजली सभेत शोकाकुल वातावरण असून उपस्थित प्रत्येकाच्या चेहऱ्यावर दुःख आणि अस्वस्थता स्पष्टपणे जाणवत होती. अजित पवार यांनी आपल्या राजकीय कारकीर्दीतून सामान्य जनतेसाठी केलेले कार्य, ग्रामीण भागाशी असलेली नाळ आणि लोकहितासाठी घेतलेले धाडसी निर्णय यांची आठवण उपस्थितांनी यावेळी करून दिली.

या श्रद्धांजली कार्यक्रमाला राष्ट्रवादी काँग्रेसचे नेते सचिन उतेकर, सुरेश सवांत, सखाराम ढेबे, रविकांत मोरे, अनिल मोरे, विश्वनाथ गायकवाड यांच्यासह कुंभरोशी आणि परिसरातील ग्रामस्थ मोठ्या संख्येने उपस्थित होते. उपस्थित मान्यवरांनी आपल्या भाषणातून अजित पवार यांच्या नेतृत्वगुणांचे, संघर्षमय प्रवासाचे आणि जनतेशी असलेल्या थेट संवादाचे कौतुक केले. ते केवळ राजकारणी नव्हते तर शेतकरी, कामगार, युवक आणि सामान्य नागरिकांचा आवाज होते, अशी भावना यावेळी व्यक्त करण्यात आली.

श्रद्धांजली अर्पण करताना अनेक ग्रामस्थ भावूक झाले होते. अजित पवार यांच्या जाण्याने महाराष्ट्राच्या राजकारणात निर्माण झालेली पोकळी भरून न निघणारी असून त्यांच्या आठवणी आणि कार्य सदैव जनतेच्या मनात राहील, असे मत यावेळी व्यक्त करण्यात आले. कार्यक्रमाच्या शेवटी दोन मिनिटांचे मौन पाळून अजित पवार यांच्या आत्म्यास शांती लाभो, अशी सामूहिक प्रार्थना करण्यात आली.