पार गावच्या सेहूल ढेबेची भारतीय सैन्य दलात निवड; दुर्गम भागातील युवकांसाठी प्रेरणादायी यश

पार गावच्या सेहूल ढेबेची भारतीय सैन्य दलात निवड; दुर्गम भागातील युवकांसाठी प्रेरणादायी यश

पार प्रतिनिधी –

पार तालुका महाबळेश्वर येथील सेहूल बाळू ढेबे याची भारतीय सैन्य दलात निवड झाल्याने संपूर्ण गावासह परिसरात आनंद आणि अभिमानाचे वातावरण निर्माण झाले आहे. नुकत्याच पार पडलेल्या भारतीय सैन्य दलाच्या भरती प्रक्रियेत सेहूलने यश मिळवत आपल्या कठोर परिश्रमांचे फळ मिळवले आहे. अनेक दिवसांपासून सैन्य दलात भरती होण्यासाठी अथक मेहनत, शिस्तबद्ध सराव आणि दृढ इच्छाशक्तीच्या जोरावर त्याने हे यश संपादन केले असून, त्याची ही कामगिरी महाबळेश्वरच्या पश्चिम आणि दुर्गम भागातील पार गावातील तरुणांसाठी नवा आदर्श ठरली आहे.

सेहूल ढेबेच्या या यशाबद्दल बोलताना भिकू दादा सोंडकर यांनी ही निवड संपूर्ण गावासाठी अभिमानास्पद असल्याचे प्रतिपादन केले. ग्रामीण आणि दुर्गम भागातील तरुणांनी परिस्थितीवर मात करून देशसेवेचे स्वप्न साकार करावे, यासाठी सेहूलचे यश प्रेरणादायी असल्याचे त्यांनी सांगितले. कठोर मेहनत, संयम आणि आत्मविश्वास असेल तर कोणतेही ध्येय गाठता येते, याचे जिवंत उदाहरण सेहूल ढेबेने दिल्याचेही त्यांनी नमूद केले.

या यशाच्या निमित्ताने पार गावातील ग्रामस्थांच्या वतीने श्रीरामवरदायिनी मंदिरात सेहूल ढेबे याचा सत्कार सोहळा आयोजित करण्यात आला होता. या कार्यक्रमास बहुसंख्य ग्रामस्थ, महिला आणि तरुण वर्ग मोठ्या संख्येने उपस्थित होता. ग्रामस्थांनी सेहूलला देशसेवेसाठी तसेच त्याच्या उज्वल भविष्यासाठी शुभेच्छा दिल्या. या प्रसंगी गावातील वातावरण उत्साहपूर्ण आणि भारावलेले होते.

या सत्कार सोहळ्यास सुभाष महादेव सोंडकर, संजय मोरे, सुभाष शंकरराव सोंडकर यांच्यासह गावातील सर्व ग्रामस्थ व तरुणवर्ग उपस्थित होता. सेहूल ढेबेच्या या यशामुळे पार गावाचे नाव तालुका व जिल्हा पातळीवर उज्वल झाले असून, भविष्यात आणखी युवक सैन्य दलात भरती होण्यासाठी प्रेरित होतील, अशी अपेक्षा ग्रामस्थांनी व्यक्त केली.