महाराष्ट्राला पहिली महिला उपमुख्यमंत्री; सुनेत्रा पवार यांनी घेतली उपमुख्यमंत्रीपदाची शपथ
मुंबई प्रतिनिधी :
महाराष्ट्राच्या राजकारणात आज एक ऐतिहासिक क्षण साकार झाला असून सुनेत्रा पवार यांनी आज, शुक्रवार ३१ जानेवारी २०२६ रोजी उपमुख्यमंत्रीपदाची शपथ घेतली. या शपथविधीमुळे त्या महाराष्ट्राच्या इतिहासातील पहिल्या महिला उपमुख्यमंत्री ठरल्या आहेत. संध्याकाळी ठीक पाच वाजता मुंबईतील ‘लोकभवन’ येथे पार पडलेल्या सोहळ्यात राज्यपाल आचार्य देवव्रत यांनी त्यांना पद व गोपनीयतेची शपथ दिली. यावेळी मुख्यमंत्री देवेंद्र फडणवीस यांच्यासह राष्ट्रवादी काँग्रेसचे वरिष्ठ नेते उपस्थित होते.
उपमुख्यमंत्री अजित पवार यांच्या २८ जानेवारी २०२६ रोजी झालेल्या दुर्दैवी विमान अपघातातील निधनानंतर निर्माण झालेल्या राजकीय पोकळीवर आज शिक्कामोर्तब करण्यात आले. त्यांच्या निधनामुळे रिक्त झालेल्या उपमुख्यमंत्रीपदासाठी राष्ट्रवादी काँग्रेसने सुनेत्रा पवार यांच्या नावावर विश्वास व्यक्त केला. त्यासाठी आज दुपारी विधान भवनात राष्ट्रवादी काँग्रेसच्या ४० आमदारांची महत्त्वाची बैठक पार पडली. या बैठकीत ज्येष्ठ नेते छगन भुजबळ यांनी मांडलेल्या प्रस्तावानुसार सुनेत्रा पवार यांची राष्ट्रवादी काँग्रेसच्या विधिमंडळ पक्षनेतेपदी एकमताने निवड करण्यात आली. त्यानंतर काही तासांतच राज्यपालांकडून त्यांचा शपथविधी पार पडला.
सुनेत्रा पवार या सध्या राज्यसभेच्या खासदार असून त्या विधानसभेच्या सदस्य नाहीत. त्यामुळे संविधानिक तरतुदीनुसार त्यांना पुढील सहा महिन्यांच्या आत विधानमंडळाच्या कोणत्याही एका सभागृहावर निवडून येणे आवश्यक आहे. अजित पवार यांच्या निधनामुळे रिक्त झालेल्या बारामती विधानसभा मतदारसंघातून त्या पोटनिवडणूक लढवण्याची दाट शक्यता वर्तवली जात आहे.
खात्यांच्या वाटपाबाबत प्राथमिक माहितीनुसार सुनेत्रा पवार यांच्याकडे अबकारी आणि क्रीडा ही महत्त्वाची खाती सोपवली जाण्याची शक्यता आहे, तर अर्थमंत्रालयाचा कार्यभार सध्या तात्पुरत्या स्वरूपात मुख्यमंत्री देवेंद्र फडणवीस यांच्याकडे राहणार असल्याचे संकेत आहेत. नव्या उपमुख्यमंत्र्यांच्या रूपाने सरकारमध्ये महिला नेतृत्वाचा ठसा अधिक ठळक होणार असल्याची चर्चा राजकीय वर्तुळात सुरू आहे.
दरम्यान, या शपथविधी सोहळ्याला राष्ट्रवादी काँग्रेसचे ज्येष्ठ नेते शरद पवार किंवा त्यांच्या कुटुंबातील इतर सदस्य उपस्थित नव्हते. त्यांनी ही बाब पक्षाची अंतर्गत प्रक्रिया असल्याचे सांगत सुनेत्रा पवार यांना शुभेच्छा दिल्या आहेत. एकूणच, महाराष्ट्राच्या राजकीय इतिहासात नवा अध्याय सुरू करणाऱ्या या शपथविधीकडे राज्यभराचे लक्ष लागून राहिले आहे.
Comments
Post a Comment