“चतुरबेट ग्रामस्थांचा शिवसेनेला जाहीर पाठिंबा; प्रचाराचा शुभारंभ होताच प्रचाराला वेग”
दुधगाव प्रतिनिधी –
महाबळेश्वर तालुक्यातील जिल्हा परिषद व पंचायत समिती निवडणुकांच्या पार्श्वभूमीवर राजकीय हालचालींना चांगलाच वेग आला असून उमेदवारांनी थेट जनसंपर्काला सुरुवात केली आहे. शिवसेनेचे जिल्हा परिषदेचे उमेदवार अजित सपकाळ आणि पंचायत समितीचे उमेदवार संजय मोरे यांनी उमेदवारी अर्ज दाखल केल्यानंतर चतुरबेट गावातून अधिकृतरीत्या प्रचाराचा शुभारंभ केला. या निमित्ताने चतुरबेट ग्रामस्थांशी थेट संवाद साधत सविस्तर चर्चा करण्यात आली.
या भेटीदरम्यान ग्रामस्थांनी गावातील पाणीपुरवठ्याची समस्या, रस्त्यांची दुरवस्था, वीजपुरवठा, आरोग्य सुविधा तसेच इतर मूलभूत प्रश्न मोकळेपणाने मांडले. उमेदवारांनी सर्व प्रश्न शांतपणे आणि लक्षपूर्वक ऐकून घेत विकासाभिमुख व सकारात्मक मार्गाने या समस्या सोडवण्यासाठी आपण कटिबद्ध असल्याचे आश्वासन दिले. गावाच्या सर्वांगीण विकासासाठी स्थानिक ग्रामस्थांना विश्वासात घेऊन, त्यांच्या सहकार्याने काम केले जाईल, अशी ग्वाहीही यावेळी देण्यात आली.
या कार्यक्रमास शिवसेनेचे तालुकाप्रमुख गणेश उतेकर उपस्थित होते. त्यांनी ग्रामस्थांशी संवाद साधताना उपमुख्यमंत्री एकनाथ शिंदे यांच्या नेतृत्वाखाली महाबळेश्वर तालुक्यात राबविण्यात आलेल्या विविध विकासकामांची माहिती दिली. रस्ते विकास, पायाभूत सुविधा, पर्यटन विकास आणि ग्रामीण भागासाठीच्या विविध योजनांमुळे तालुक्याचा विकास वेगाने होत असून हीच विकासाची दिशा पुढील काळातही कायम राहील, असा विश्वास त्यांनी व्यक्त केला.
या चर्चेनंतर चतुरबेट ग्रामस्थांनी शिवसेनेच्या उमेदवारांना जाहीर पाठिंबा दर्शवित आगामी निवडणुकीत विकासाच्या मुद्द्यावर त्यांना साथ देण्याचा निर्धार व्यक्त केला. युवक, शेतकरी, महिला आणि ज्येष्ठ नागरिकांचा मोठा प्रतिसाद लाभल्याने शिवसेनेच्या प्रचाराला नवे बळ मिळाले आहे. चतुरबेटपासून सुरू झालेल्या या प्रचारामुळे परिसरातील राजकीय वातावरण अधिकच तापले असून पुढील दिवसांत प्रचार आणखी तीव्र होण्याची चिन्हे दिसत आहेत.
Comments
Post a Comment