शिक्षणाच्या उज्ज्वल भविष्याकडे नवा टप्पा : राजपुरी ज्ञानमंदिराच्या भव्य नव्या इमारतीचे भूमिपूजन उत्साहात

शिक्षणाच्या उज्ज्वल भविष्याकडे नवा टप्पा : राजपुरी ज्ञानमंदिराच्या भव्य नव्या इमारतीचे भूमिपूजन उत्साहात

पाचगणी प्रतिनिधी : 

राजपुरी गावच्या शैक्षणिक इतिहासात मोलाचा ठरणारा क्षण शुक्रवारी साकारला. शतकोत्तर परंपरा लाभलेल्या जिल्हा परिषद आदर्श प्राथमिक शाळा राजपुरी ज्ञानमंदिराच्या नव्या भव्य व प्रशस्त इमारतीचा भूमिपूजन सोहळा शुक्रवार, दिनांक २ जानेवारी रोजी सातारा जिल्हा मध्यवर्ती सहकारी बँकेचे संचालक राजेंद्रशेठ राजपुरे यांच्या हस्ते व प्रमुख उपस्थितीत अत्यंत उत्साहात पार पडला.

या कार्यक्रमाला शीतलताई राजपुरे, भाऊसाहेब दानवले, दगडू ढेबे, संजय पार्टे, लक्ष्मण हिरवे, रवी भिलारे, अमित कारंडे, संदीप राजपुरे, सुरेंद्र भिलारे, अरविंद चोरट, उद्धव निकम, अमोल गायकवाड, योगिता पोळ, निलोफर सय्यद यांच्यासह ग्रामस्थ, पालक आणि शिक्षणप्रेमी नागरिक मोठ्या संख्येने उपस्थित होते. उपस्थित मान्यवरांनी शाळेच्या विकासाबाबत समाधान व्यक्त करत भावी पिढीच्या शिक्षणासाठी हा प्रकल्प अत्यंत महत्त्वाचा असल्याचे मत मांडले.

राजपुरी गावातील ग्रामस्थांनी गेल्या अनेक वर्षांपासून नव्या शाळा इमारतीसाठी केलेल्या प्रयत्नांना अखेर यश आले असून, या भूमिपूजनामुळे त्या स्वप्नांना मूर्त स्वरूप मिळण्याची सुरुवात झाली आहे. विद्यार्थ्यांना दर्जेदार शिक्षणासोबतच सुरक्षित, सुसज्ज आणि प्रेरणादायी वातावरण मिळावे, यासाठी ही नवी इमारत महत्त्वाची ठरणार आहे. अद्ययावत सुविधा, प्रशस्त वर्गखोल्या आणि शैक्षणिक उपक्रमांसाठी पूरक रचना असलेले ज्ञानमंदिर उभारले जाणार असल्याने शिक्षणाच्या गुणवत्तेत लक्षणीय वाढ होईल, अशी अपेक्षा व्यक्त करण्यात येत आहे.

कार्यक्रमात बाळासो सोनटक्के यांच्या मंत्रोच्चारात विधीवत भूमिपूजन करण्यात आले. या शाळा इमारतीसाठी तब्बल ९१ लाख रुपयांचा निधी मंजूर झाला असून, या निधीतून आधुनिक आणि विद्यार्थीकेंद्रित शाळा इमारत उभी राहणार आहे. हा प्रकल्प पूर्ण झाल्यानंतर राजपुरीसह परिसरातील विद्यार्थ्यांना त्याचा मोठा लाभ होणार असून, ग्रामीण भागातील शिक्षणाचा दर्जा उंचावण्यासाठी हे ज्ञानमंदिर दिशादर्शक ठरेल, असा विश्वास उपस्थितांनी व्यक्त केला.