साताऱ्यात भाजपाचा ऐतिहासिक झंझावात; नगरपालिकांनंतर आता जिल्हा परिषदही भाजपाचीच होणार – देवेंद्र फडणवीसांचा विश्वास

साताऱ्यात भाजपाचा ऐतिहासिक झंझावात; नगरपालिकांनंतर आता जिल्हा परिषदही भाजपाचीच होणार – देवेंद्र फडणवीसांचा विश्वास

सातारा प्रतिनिधी :

 सातारा जिल्ह्यातील नवनिर्वाचित भाजपा नगराध्यक्ष व नगरसेवकांच्या भव्य सत्कार सोहळ्यात राज्याचे उपमुख्यमंत्री देवेंद्र फडणवीस यांनी कार्यकर्त्यांना संबोधित करताना सातारा जिल्ह्यात भाजपाने घडवलेला विजय हा ऐतिहासिक असल्याचे स्पष्ट शब्दांत सांगितले. पहिल्यांदाच सातारा जिल्ह्यात भारतीय जनता पक्षाने इतक्या मोठ्या प्रमाणात यश मिळवत इतर सर्व पक्षांना मागे टाकले असून भाजपाची निर्णायक मुसंडी सर्वांनाच आश्चर्यचकित करणारी आहे, असे त्यांनी नमूद केले.

सातारा नगरपालिकेतील विजयाचा उल्लेख करताना फडणवीस म्हणाले की, नगराध्यक्ष अमोल मोहिते यांनी तब्बल ४२ हजार मतांच्या फरकाने विजय मिळवून महाराष्ट्राच्या नगरपालिकांच्या राजकारणात नवा विक्रम प्रस्थापित केला आहे. हा विजय केवळ संख्येचा नसून जनतेच्या विश्वासाचा कौल असल्याचे त्यांनी सांगितले. या यशाने सातारा जिल्ह्यात भाजपाचे बळ अधिक मजबूत झाले असल्याचे त्यांनी अधोरेखित केले.

जिल्ह्यातील इतर नगरपालिकांतील विजयाचाही त्यांनी सविस्तर आढावा घेतला. मसवड नगरपालिकेत २१-० असा एकतर्फी विजय मिळवत पूजाताई विरकर नगराध्यक्ष झाल्या असून हा निकाल भाजपाच्या संघटन शक्तीचे प्रतीक आहे, असे त्यांनी सांगितले. मलकापूर नगरपालिकेत अतुल बाबा भोसले यांच्या नेतृत्वाखाली तेजस सोनावले आणि त्यांच्या संपूर्ण टीमने दणदणीत विजय मिळवला. फलटणमध्ये तब्बल ३० वर्षांची सत्ता उलथवून समशेरसिंह नाईक निंबाळकर यांनी विजय मिळवून इतिहास घडवला, तर वाई नगरपालिकेत अनिल सावंत यांच्या रूपाने कमळ फुलल्याचे त्यांनी नमूद केले.

रहमतपूर नगरपालिकेचा उल्लेख करताना फडणवीस म्हणाले की, १८५३ मध्ये स्थापन झालेल्या महाराष्ट्रातील पहिल्या नगरपरिषदेच्या पहिल्या लोकनियुक्त महिला नगराध्यक्ष म्हणून वैशालीताई माने यांची निवड होणे ही ऐतिहासिक घटना आहे. हा विजय महिला नेतृत्वाच्या ताकदीचे प्रतीक असल्याचेही त्यांनी सांगितले.

राज्यातील एकूण परिस्थितीवर भाष्य करताना देवेंद्र फडणवीस यांनी सांगितले की, संपूर्ण महाराष्ट्रात भाजपाने १२० हून अधिक नगराध्यक्ष आणि ३ हजारांहून अधिक नगरसेवक निवडून आणले असून महायुतीने सुमारे ७५ टक्के जागांवर विजय मिळवला आहे. हा निकाल जनतेने विकास, पारदर्शकता आणि स्थिर नेतृत्वावर व्यक्त केलेला विश्वास असल्याचे त्यांनी स्पष्ट केले.

नवनिर्वाचित नगराध्यक्ष आणि नगरसेवकांना मार्गदर्शन करताना फडणवीस यांनी पारदर्शक आणि प्रामाणिक कारभार करण्याचा ठाम सल्ला दिला. नगरपालिका या भ्रष्टाचाराचे अड्डे न बनता जनतेच्या पैशाचे विश्वस्त म्हणून काम करायला हवे, अशी अपेक्षा त्यांनी व्यक्त केली. जनतेने दिलेल्या संधीचे सोने करून दाखवणे ही प्रत्येक प्रतिनिधीची जबाबदारी असल्याचे त्यांनी सांगितले.

पालिकांमधील या मोठ्या यशानंतर आता सातारा जिल्हा परिषद जिंकण्याचे पुढील लक्ष्य असल्याचे जाहीर करत फडणवीस म्हणाले की, आगामी निवडणुकांमध्येही सातारा जिल्ह्यावर भाजपाचाच झेंडा फडकेल. कार्यकर्त्यांनी संघटन मजबूत ठेवून तळागाळातील जनतेपर्यंत विकास पोहोचवण्याचे काम करावे, असे आवाहन त्यांनी यावेळी केले. या सत्कार सोहळ्यामुळे भाजपाच्या कार्यकर्त्यांमध्ये नवचैतन्य संचारले असून सातारा जिल्ह्यातील राजकारणात भाजपाची पकड अधिक घट्ट झाल्याचे स्पष्टपणे दिसून येत आहे.