कुमठे ग्रामपंचायत उपसरपंच सीताराम (दादा) राणे यांची प्रतापगड पंचक्रोशी सोसायटीच्या अध्यक्षपदी निवड — पार व कुमठे ग्रामस्थांतर्फे भव्य सत्कार
पार प्रतिनिधी –
कुमठे ग्रामपंचायतीचे उपसरपंच मा. सीताराम (दादा) राणे यांची प्रतापगड पंचक्रोशी सोसायटी या संस्थेच्या अध्यक्षपदी निवड झाल्याबद्दल पार गावच्या वतीने तसेच कुमठे गावच्या वतीने त्यांचा जाहीर सत्कार करण्यात आला. दादांच्या सामाजिक, सहकारी आणि लोकहिताच्या कार्याची दखल घेत ही निवड झाल्याने पंचक्रोशीतील नागरिकांमध्ये समाधान आणि आनंदाचे वातावरण निर्माण झाले आहे.
या सत्कारप्रसंगी दादा राणे यांच्या कार्याचा गौरव करत ग्रामस्थांनी त्यांच्या नेतृत्वावर विश्वास व्यक्त केला. सहकार क्षेत्रातील अनुभव, सर्वसामान्यांशी असलेली आपुलकी आणि पारदर्शक कार्यपद्धतीच्या जोरावर प्रतापगड पंचक्रोशी सोसायटीच्या माध्यमातून शेतकरी, कामगार आणि सभासदांच्या हितासाठी भरीव काम घडेल, असा विश्वास उपस्थितांनी व्यक्त केला.
या वेळी कुमठे गावच्या सरपंच सौ. स्वाती संतोष जाधव यांनी दादा राणे यांना पुढील कार्यासाठी मनःपूर्वक शुभेच्छा दिल्या. सोसायटीच्या माध्यमातून गावाच्या आणि परिसराच्या सर्वांगीण विकासाला चालना मिळेल, सहकार चळवळ अधिक बळकट होईल आणि सर्वसामान्य घटकांना न्याय मिळेल, अशी अपेक्षाही त्यांनी व्यक्त केली.
पार व कुमठे येथील ग्रामस्थांनी दादा राणे यांच्या निवडीचे स्वागत करत त्यांच्या पुढील कार्यकाळासाठी शुभेच्छांचा वर्षाव केला. सर्वांच्या सहकार्याने प्रतापगड पंचक्रोशी सोसायटी निश्चितच प्रगतीच्या मार्गावर जाईल, असा विश्वास व्यक्त करत कार्यक्रम आनंदी वातावरणात पार पडला.
Comments
Post a Comment