तळदेव येथे स्वयंभू तळेश्वराची भव्य दिव्य यात्रा; भक्तिभाव, सांस्कृतिक कार्यक्रम आणि काटे पालखीचे विशेष आकर्षण

तळदेव येथे स्वयंभू तळेश्वराची भव्य दिव्य यात्रा; भक्तिभाव, सांस्कृतिक कार्यक्रम आणि काटे पालखीचे विशेष आकर्षण

तळदेव प्रतिनिधी –

महाबळेश्वर तालुक्यातील तळदेव येथील स्वयंभू लिंग असलेल्या जागृत देवस्थान श्री तळेश्वर महादेवाची वार्षिक यात्रा आज मंगळवार, ६ जानेवारी रोजी मोठ्या भक्तिभावात आणि उत्साहात सुरू झाली आहे. सकाळपासूनच देवाच्या अभिषेकाने यात्रेची विधिवत सुरुवात झाली असून परिसरात ‘हर हर महादेव’च्या जयघोषात भक्तिमय वातावरण निर्माण झाले आहे. पंचक्रोशीतील भाविक मोठ्या संख्येने तळदेवकडे दाखल होत असून देवदर्शनासाठी रांगा लागल्या आहेत.

आज सायंकाळी सात वाजल्यापासून यात्रेनिमित्त आलेल्या भाविकांसाठी महाप्रसादाचे आयोजन करण्यात आले आहे. रात्री देवाचा छबिना, जागरण आणि गोंधळाचा कार्यक्रम होणार असून त्यानंतर शालेय विद्यार्थ्यांचे सांस्कृतिक कार्यक्रम सादर केले जाणार आहेत. भाविकांच्या मनोरंजनासाठी रात्री ठीक दहा वाजता हिंदी व मराठी गाण्यांचा ऑर्केस्ट्रा कार्यक्रम आयोजित करण्यात आला आहे. यानंतर पहाटे तीन वाजता लोकनाट्य तमाशाचा कार्यक्रम होणार असून यात्रेतील पारंपरिक रंगत अनुभवता येणार आहे.

उद्या बुधवार, ७ जानेवारी रोजी सकाळी देवाची महाआरती होणार असून त्यानंतर सकाळी दहा वाजल्यापासून पुन्हा लोकनाट्य तमाशाचे कार्यक्रम आयोजित करण्यात आले आहेत. यात्रेचे मुख्य आकर्षण सायंकाळी काटे पालखी असून या भक्तीमय सोहळ्याने यात्रेची सांगता होणार आहे. काटे पालखी पाहण्यासाठी आणि या अद्भुत परंपरेचा अनुभव घेण्यासाठी भाविक मोठ्या संख्येने उपस्थित राहण्याची अपेक्षा आहे.

या यात्रेनिमित्त सर्व कार्यक्रमांचा आणि महाप्रसादाचा लाभ भाविकांनी घ्यावा, असे आवाहन तळदेव गावचे सरपंच रामचंद्र जंगम, यात्रा कमिटी तसेच ग्रामस्थांच्या वतीने करण्यात आले आहे. सुव्यवस्थित नियोजन, भक्ती आणि संस्कृती यांचा संगम असलेली तळदेवची ही यात्रा दरवर्षीप्रमाणे यंदाही भाविकांच्या श्रद्धेचा केंद्रबिंदू ठरत आहे.