टाकाऊ वस्तूंपासून टिकाऊ भविष्य : इनरव्हील क्लब ऑफ महाबळेश्वरतर्फे फारुखाबादमध्ये हस्तकला कार्यशाळा, विद्यार्थ्यांचा उत्साह वाढवणारा उपक्रम
महाबळेश्वर प्रतिनिधी :
सेवाकार्यात नेहमीच पुढाकार घेणाऱ्या इनरव्हील क्लब ऑफ महाबळेश्वरने सामाजिक बांधिलकीची जाण ठेवत उत्तर प्रदेशातील फारुखाबाद येथील एस. एम. ज्युनिअर हायस्कूलमध्ये अनोखी हस्तकला कार्यशाळा आयोजित केली. शाळेतील विद्यार्थ्यांसाठी राबविण्यात आलेल्या या उपक्रमामध्ये टाकाऊ वस्तूंमधून टिकाऊ, उपयुक्त आणि आकर्षक वस्तू कशा तयार करता येतात याबाबत सविस्तर मार्गदर्शन देण्यात आले. पर्यावरणपूरक दृष्टीकोन आणि सर्जनशीलतेला चालना देणारी ही कार्यशाळा विद्यार्थ्यांसाठी अत्यंत उपयुक्त ठरली.
कार्यक्रमादरम्यान विद्यार्थ्यांनी प्लास्टिकच्या बाटल्या, पेपर, कार्डबोर्ड, जुनी कपडे, लाकडी तुकडे अशा दैनंदिन वापरातील टाकाऊ साहित्याचा वापर करून उपयुक्त वस्तू तयार करण्याचा प्रत्यक्ष अनुभव घेतला. यामुळे ‘री-युज’ आणि ‘री-सायकल’ या संकल्पनांची ओळख विद्यार्थ्यांना सोप्या पद्धतीने झाली.
शाळेची मूलभूत गरज लक्षात घेऊन इनरव्हील क्लबने आणखी एक महत्त्वपूर्ण सामाजिक योगदान दिले. शाळेतील तुटलेल्या बेंचची दुरुस्ती तसेच खराब झालेल्या बेंचच्या जागी नवीन बेंच उपलब्ध करून देण्यासाठी आर्थिक मदत क्लबच्यावतीने देण्यात आली. या उपक्रमामुळे विद्यार्थ्यांना स्वच्छ, सुरक्षित आणि सोयीस्कर शिक्षण वातावरण मिळण्यास मदत झाली.
हा सर्व उपक्रम इनरव्हील क्लबच्या सचिव सपना अरोरा यांच्या मार्गदर्शनाखाली आणि क्लबच्या अध्यक्षा वर्षा संतोष पार्टे यांच्या उपस्थितीत अत्यंत यशस्वीपणे पार पडला. विद्यार्थ्यांच्या चेहऱ्यावरील आनंद पाहता या उपक्रमाचा सकारात्मक परिणाम स्पष्ट दिसून येत होता.
कार्यशाळेच्या शेवटी विद्यार्थ्यांना बिस्किटे व चिप्सचे वाटप करण्यात आले. या छोट्याशा उपहाराने मुलांच्या दिवसात आनंदाची भर पडली आणि त्यांच्या उत्साहात अधिक वाढ झाली. सेवाभाव, पर्यावरण जागरूकता आणि शिक्षणाचा संगम साकार करणारा हा उपक्रम इनरव्हील क्लबच्या सामाजिक कार्यातील आणखी एक महत्त्वपूर्ण अध्याय ठरला असून स्थानिक पातळीवर त्याचे कौतुक होत आहे.
Comments
Post a Comment