बारामती नगरपालिकेवर अजित पवार गटाची एकहाती सत्ता; सचिन सातव उच्चांकी मतांनी नगराध्यक्षपदी विजयी
बारामती प्रतिनिधी–
बारामती नगरपालिकेच्या सार्वत्रिक निवडणुकीत उपमुख्यमंत्री अजित पवार यांच्या नेतृत्वाखालील राष्ट्रवादी काँग्रेसने निर्विवाद वर्चस्व सिद्ध करत नगरपालिकेवर एकहाती सत्ता प्रस्थापित केली आहे. नगराध्यक्षपदासाठी राष्ट्रवादी काँग्रेस (अजित पवार गट) चे उमेदवार सचिन सातव यांनी प्रतिस्पर्ध्यांचा पराभव करत उच्चांकी मतांनी दणदणीत विजय मिळवला असून या विजयामुळे बारामतीतील राष्ट्रवादीची राजकीय पकड पुन्हा एकदा अधोरेखित झाली आहे.
या निवडणुकीत नगरसेवक पदाच्या एकूण ४१ जागांपैकी आठ उमेदवार बिनविरोध निवडून आले होते, तर उर्वरित ३३ जागांसाठी प्रत्यक्ष निवडणूक पार पडली. या ३३ जागांपैकी तब्बल २७ जागांवर राष्ट्रवादी काँग्रेस (अजित पवार गट) ने निर्विवाद बहुमत मिळवत विरोधकांना पूर्णपणे पिछाडीवर टाकले. प्रभागनिहाय निकाल पाहता बहुतांश ठिकाणी राष्ट्रवादीच्या उमेदवारांना मतदारांचा मोठा पाठिंबा मिळाल्याचे स्पष्ट झाले.
दरम्यान, राष्ट्रवादी काँग्रेसच्या शरद पवार गटाला या निवडणुकीत केवळ एकाच जागेवर समाधान मानावे लागले. तसेच राष्ट्रीय समाज पक्षाला एक जागा, बहुजन समाज पार्टीला एक जागा मिळाली, तर तीन जागांवर अपक्ष उमेदवारांनी विजय मिळवला आहे. विरोधी पक्षांना अत्यल्प जागांवरच समाधान मानावे लागल्याने बारामतीतील राजकीय समीकरण पूर्णतः राष्ट्रवादीच्या बाजूने झुकल्याचे चित्र आहे.
नगराध्यक्षपदी सचिन सातव यांच्या विजयासोबतच नगरसेवकांमध्येही राष्ट्रवादीला स्पष्ट बहुमत मिळाल्याने आगामी काळात विकासकामे, नागरी सुविधा, पायाभूत प्रकल्प आणि शहराच्या सर्वांगीण विकासासाठी निर्णय घेणे अधिक सुलभ होणार असल्याचे बोलले जात आहे. विजयानंतर राष्ट्रवादी कार्यकर्त्यांनी शहरात जल्लोष करत फटाक्यांची आतषबाजी केली, तर सचिन सातव यांनी मतदारांचे आभार मानत बारामतीच्या विकासासाठी पक्षाच्या नेतृत्वाखाली समन्वयाने काम करण्याचा निर्धार व्यक्त केला आहे.
एकूणच या निकालामुळे बारामतीतील राजकारणात अजित पवार गटाची पकड अधिक मजबूत झाली असून, आगामी स्थानिक स्वराज्य संस्थांच्या राजकारणावरही या विजयाचा प्रभाव पडणार असल्याचे राजकीय वर्तुळात बोलले जात आहे.
Comments
Post a Comment