बिरमणीमध्ये २८ वर्षांची परंपरा जपणाऱ्या ‘श्री भैरवनाथ चषक २०२६’ क्रिकेट स्पर्धेचा थरार; विजेत्यास २१ हजारांचे बक्षीस

बिरमणीमध्ये २८ वर्षांची परंपरा जपणाऱ्या ‘श्री भैरवनाथ चषक २०२६’ क्रिकेट स्पर्धेचा थरार; विजेत्यास २१ हजारांचे बक्षीस

प्रतापगड प्रतिनिधी —

महाबळेश्वर तालुक्यातील बिरमणी येथे गेल्या २८ वर्षांपासून सातत्याने आयोजित करण्यात येणारी आणि परिसरात विशेष उत्सुकतेने पाहिली जाणारी ‘श्री भैरवनाथ चषक २०२६’ भव्य क्रिकेट स्पर्धा येत्या बुधवार, दि. ३१ डिसेंबर २०२५ ते शुक्रवार, दि. २ जानेवारी २०२६ या कालावधीत रंगणार आहे. या तीन दिवसांच्या स्पर्धेत जिल्ह्यातील तसेच बाहेरील नामवंत संघ सहभागी होणार असून क्रिकेटप्रेमींना चुरशीचे सामने पाहण्याची संधी मिळणार आहे.

या स्पर्धेचा उद्घाटन सोहळा बुधवार, दि. ३१ डिसेंबर रोजी सकाळी ९ वाजता पार पडणार आहे. त्यानंतर सकाळी १० ते सायंकाळी ५ या वेळेत पहिल्या फेरीचे सामने खेळवले जातील. गुरुवार, दि. १ जानेवारी रोजी पहिल्या आणि दुसऱ्या फेरीतील सामने होतील, तर शुक्रवार, दि. २ जानेवारी रोजी सकाळी ९ ते दुपारी ३ या वेळेत अंतिम फेरीचा उत्कंठावर्धक सामना रंगणार आहे. त्याच दिवशी रात्री १०.३० वाजता भव्य पारितोषिक वितरण समारंभाचे आयोजन करण्यात आले आहे.

या स्पर्धेत विजेत्या संघाला २१ हजार रुपये रोख आणि आकर्षक चषक देऊन गौरविण्यात येणार आहे. हे प्रथम पारितोषिक श्री. विनोद शंकर मोरे, अध्यक्ष — पालघर जिल्हा वाहतूक सेना, महाराष्ट्र नवनिर्माण सेनेच्या सौजन्याने देण्यात येणार आहे. द्वितीय क्रमांक पटकावणाऱ्या संघाला ११ हजार रुपये आणि चषक देण्यात येणार असून हे पारितोषिक श्री. सचिन उतेकर, हॉटेल सह्याद्री ढाबा यांच्या सौजन्याने आहे. तृतीय क्रमांकासाठी ७ हजार रुपये आणि चषक देण्यात येणार असून हे पारितोषिक कुमार सिद्धेश सुभाष घाटगे यांच्या सौजन्याने प्रदान केले जाणार आहे.

याशिवाय मालिकावीर खेळाडूस १ हजार रुपये आणि चषक श्री. सुयोग सोंडकर यांच्या सौजन्याने देण्यात येणार असून उत्कृष्ट कामगिरी करणाऱ्या खेळाडूसाठी श्री. सतीश मोरे यांच्या सौजन्याने बॅट देण्यात येणार आहे. तसेच उत्कृष्ट फलंदाज, उत्कृष्ट गोलंदाज, उत्कृष्ट क्षेत्ररक्षक आणि षटकार किंग यांना प्रत्येकी ५०० रुपये आणि चषक देऊन सन्मानित करण्यात येणार आहे.

स्पर्धेचे सर्व सामने बाद पद्धतीने खेळवले जाणार असून सामान्य सामने ४ षटकांचे तर अंतिम सामना ६ षटकांचा असणार आहे. पंचांचा निर्णय अंतिम राहील आणि फेकी (चकींग) गोलंदाजीवर पूर्णतः बंदी घालण्यात आली आहे. स्पर्धेसाठी पहिल्या दिवशी प्रवेश शुल्क १,००० रुपये तर दुसऱ्या दिवशी १,५०० रुपये ठेवण्यात आले आहे. संघनोंदणीची अंतिम मुदत १ जानेवारी २०२६ रोजी दुपारी १२ वाजेपर्यंत ठेवण्यात आली आहे.

स्पर्धेत सहभागी होणाऱ्या सर्व संघांसाठी दुपारच्या जेवणाची उत्तम व्यवस्था कु. विहान योगेश मोरे आणि ध्रुव राकेश मोरे यांच्या सौजन्याने करण्यात आली आहे. तसेच कु. साईराज मोरे यांच्या सौजन्याने चेंडूंची व्यवस्था तर श्री. पांडुरंग भोसले यांच्या सौजन्याने डीजे साऊंडची सुविधा उपलब्ध करून देण्यात आली आहे.

या भव्य स्पर्धेसाठी इच्छुक संघांनी नाव नोंदणीसाठी श्री. किशोर मोरे, श्री. सचिन मोरे, श्री. प्रदीप मोरे, श्री. अमोल मोरे किंवा श्री. विकास घाटगे यांच्याशी संपर्क साधावा, असे आवाहन आयोजकांच्या वतीने करण्यात आले आहे. ही स्पर्धा मु. पो. बिरमणी, ता. महाबळेश्वर, जि. सातारा येथील मैदानावर पार पडणार असून क्रिकेटप्रेमींनी मोठ्या संख्येने उपस्थित राहावे, असे आवाहनही आयोजकांनी केले आहे.