“संचालक मंडळ आपल्या दारी” उपक्रमातून संत रोहिदास महाराज समाज फाउंडेशनची संघटनात्मक ताकद पुन्हा अधोरेखित; जयंती उत्सव २०२६ साठी समाजात उत्साह आणि एकजूट

“संचालक मंडळ आपल्या दारी” उपक्रमातून संत रोहिदास महाराज समाज फाउंडेशनची संघटनात्मक ताकद पुन्हा अधोरेखित; जयंती उत्सव २०२६ साठी समाजात उत्साह आणि एकजूट

महाबळेश्वर प्रतिनिधी –

दिनांक २८ डिसेंबर २०२५ रोजी संत रोहिदास महाराज समाज फाउंडेशन, महाराष्ट्र राज्य यांच्या वतीने राबविण्यात आलेला “संचालक मंडळ आपल्या दारी” हा उपक्रम समाजात प्रेरणा, विश्वास आणि संघटन बळकटी देणारा ठरला. नवीन वर्षाचे कॅलेंडर वितरण आणि जयंती उत्सव २०२६ संदर्भात सखोल चर्चा करण्याच्या उद्देशाने फाउंडेशनच्या संचालक मंडळाने समाज बांधवांच्या घरोघरी भेटी देत थेट संवाद साधला.

या उपक्रमांतर्गत चार ठिकाणी भेटी घेण्यात आल्या. या भेटींमध्ये समाजातील ज्येष्ठ नागरिक, तरुण, महिला तसेच बालकांशी आपुलकीने संवाद साधत सर्वांना नवीन वर्षाच्या शुभेच्छा देण्यात आल्या. जयंती उत्सव एकाच ठिकाणी, सर्व समाज बांधवांना एकत्र येता येईल अशा नियोजनाने साजरा व्हावा, संत रोहिदास महाराजांचे विचार ऐकण्याची संधी मिळावी, तसेच कुटुंबासह येणाऱ्यांसाठी प्रवास सुखकर व सोयीचा असावा, अशा अपेक्षा समाज बांधवांनी मोकळेपणाने मांडल्या. वाई–मेढा–महाबळेश्वर विभागातील सर्व समाज बांधव मोठ्या संख्येने जयंती उत्सवात सहभागी होणार असल्याचा निर्धारही यावेळी व्यक्त करण्यात आला.

जयंती उत्सव २०२६ यशस्वी करण्याच्या दृष्टीने छापण्यात आलेली पावती पुस्तके समाज बांधवांनी उत्स्फूर्तपणे स्वीकारत फाउंडेशनला पूर्ण सहकार्य करण्याची ग्वाही दिली. सकाळी ९ वाजता वडा–कुंभरोशी येथून सुरू झालेला हा दौरा विविध ठिकाणी समाज बांधवांशी संवाद साधत रात्री ९ वाजता वाई येथे संपन्न झाला.

या संपूर्ण दौऱ्यात समाज बांधवांनी संघटनेसमोर आपल्या भावना व्यक्त करत “संघटना नेहमी गोरगरिबांच्या आणि गरजूंच्या पाठीशी उभी राहावी” हा विचार एकमुखाने मांडला. समाजातील हा विश्वास, आपुलकी आणि एकजूटच संघटनेची खरी ताकद असल्याची प्रचीती या उपक्रमातून आली.

या उपक्रमास दिलेल्या प्रतिसादाबद्दल व सहकार्याबद्दल सर्व समाज बांधवांचे संत रोहिदास महाराज समाज फाउंडेशन, महाराष्ट्र राज्य यांच्या वतीने मनःपूर्वक आभार आणि धन्यवाद व्यक्त करण्यात आले आहेत.