पाचगणी बाईकप्रेमींच्या गजरात; देशातील सर्वात मोठ्या मोटारसायकल विकेंडला दिमाखात सुरुवात
पाचगणी प्रतिनिधी —
पाचगणी शहरात देशातील सर्वात मोठ्या मोटारसायकल विकेंड फेस्टिवलला आज उत्साहात सुरुवात झाली असून 19 आणि 20 डिसेंबर रोजी होणाऱ्या IBW च्या 12 व्या मोटारसायकल विकेंडसाठी देशभरातून हजारो बायकर्स पाचगणीत दाखल झाले आहेत. भोसे गावाजवळील मुख्य रस्त्यालगत भव्य स्वरूपात उभारण्यात आलेल्या या कार्यक्रमामुळे सध्या संपूर्ण पाचगणी बाईकप्रेमींचे केंद्र बनली आहे.
विशेष म्हणजे, हा प्रतिष्ठेचा मोटारसायकल फेस्टिवल यापूर्वी अनेक वर्षे गोवा येथे आयोजित केला जात होता. गोव्यानंतर प्रथमच हा देशपातळीवरील मोठा बाईक विकेंड गोव्याबाहेर, पाचगणीत आयोजित करण्यात आला असून यामुळे पाचगणीच्या पर्यटन नकाशावर एक नवी ओळख निर्माण झाली आहे. निसर्गसंपन्न परिसर, आल्हाददायक थंड हवामान आणि पर्यटनासाठी पोषक वातावरण लक्षात घेऊन आयोजकांनी पाचगणीची निवड केल्याचे सांगितले जात आहे.
या फेस्टिवलमध्ये आधुनिक व क्लासिक मोटारसायकलींचे भव्य प्रदर्शन, थरारक स्टंट शो, रायडिंग कौशल्यांची प्रात्यक्षिके, बाईक रॅली, सुरक्षित रायडिंगबाबत मार्गदर्शन तसेच विविध नामांकित बाईक कंपन्यांचे स्टॉल उभारण्यात आले आहेत. प्रसिद्ध बाईक ब्रँड्सची नवीन मॉडेल्स पाहण्यासाठी तरुणाईची मोठी गर्दी होत असून बाईकप्रेमींमध्ये प्रचंड उत्साह पाहायला मिळत आहे.
पाचगणी–महाबळेश्वर मुख्य रस्त्यावर दिवसभर बायकर्सची वर्दळ वाढली असून देशातील विविध राज्यांमधील नंबर प्लेट असलेल्या मोटारसायकली सर्वांचे लक्ष वेधून घेत आहेत. बाईकचा गडगडाट, रंगीबेरंगी रायडिंग जॅकेट्स आणि आकर्षक हेल्मेट्समधील बायकर्समुळे संपूर्ण परिसरात एक वेगळाच जल्लोषी आणि उत्साही माहोल निर्माण झाला आहे. पर्यटकांसह स्थानिक नागरिकही हा अनोखा अनुभव मोठ्या उत्सुकतेने अनुभवत आहेत.
या भव्य फेस्टिवलचा थेट लाभ पाचगणीतील पर्यटन व्यवसायाला मिळत असून हॉटेल्स, लॉजिंग, रेस्टॉरंट्स, दुकाने आणि स्थानिक व्यावसायिकांमध्ये चांगलीच चहलपहल दिसून येत आहे. अनेक हॉटेल्स हाऊसफुल्ल झाल्याचे चित्र असून स्थानिक अर्थव्यवस्थेला मोठा चालना मिळाली आहे. एकूणच, गोव्यानंतर पाचगणीत आयोजित करण्यात आलेल्या या मोटारसायकल विकेंडमुळे पाचगणी राष्ट्रीय स्तरावरील मोठ्या इव्हेंट्सचे नवे केंद्र बनत असल्याचे स्पष्टपणे दिसून येत आहे.
Comments
Post a Comment