महाबळेश्वरमध्ये मतदान शांततेत; दुपारी १.३० वाजेपर्यंत २९.०७ टक्के मतदान, प्रभाग ९ व ३ मध्ये ईव्हीएम बिघाडाच्या घटना

महाबळेश्वरमध्ये मतदान शांततेत; दुपारी १.३० वाजेपर्यंत २९.०७ टक्के मतदान, प्रभाग ९ व ३ मध्ये ईव्हीएम बिघाडाच्या घटना

महाबळेश्वर, ता. २० (प्रतिनिधी) —

 महाबळेश्वर गिरीस्थान नगरपरिषद सार्वत्रिक निवडणुकीसाठी आज शहरात शांततापूर्ण वातावरणात आणि एकूणच सुरळीतपणे मतदान प्रक्रिया सुरू आहे. सकाळपासून मतदारांमध्ये उत्साह दिसून येत असून दुपारी १.३० वाजेपर्यंत एकूण २९.०७ टक्के मतदान झाल्याची माहिती नगरपरिषद प्रशासनाकडून देण्यात आली आहे.

शहरातील विविध मतदान केंद्रांवर सकाळी मतदारांच्या रांगा लागलेल्या दिसून आल्या. नागरिकांनी लोकशाहीच्या या महत्त्वाच्या प्रक्रियेत सहभागी होत आपला मतदानाचा हक्क बजावला. ज्येष्ठ नागरिक, महिला तसेच युवकांचा सहभाग लक्षणीय असून मतदान केंद्र परिसरात पोलीस प्रशासनाच्या बंदोबस्तामुळे शिस्तबद्ध आणि शांत वातावरण कायम आहे.

दरम्यान, प्रभाग क्रमांक ९ मधील एका मतदान केंद्रावर ईव्हीएम मशीन बंद पडल्याची घटना दोन वेळा घडल्याने काही काळ मतदान प्रक्रियेत अडथळा निर्माण झाला. निवडणूक कर्मचाऱ्यांनी तातडीने दखल घेत तांत्रिक अडचण दूर केल्यानंतर मतदान प्रक्रिया पुन्हा सुरू करण्यात आली. या घटनेमुळे काही वेळ मतदारांना प्रतीक्षा करावी लागली असली तरी परिस्थिती नियंत्रणात राहिल्याचे प्रशासनाने स्पष्ट केले आहे.

याशिवाय प्रभाग क्रमांक ३ मधील एका मतदान केंद्रात ईव्हीएम मशीन तब्बल तासभर बंद पडल्याची घटना उघडकीस आली आहे. या तांत्रिक बिघाडामुळे मतदान काही काळ थांबले होते. संबंधित यंत्रणा व निवडणूक कर्मचाऱ्यांनी आवश्यक दुरुस्ती व उपाययोजना केल्यानंतर मतदान पुन्हा सुरू करण्यात आले असून त्यानंतर परिस्थिती सुरळीत झाल्याचे प्रशासनाने सांगितले.

मतदान प्रक्रिया शांततेत आणि पारदर्शकपणे पार पडावी यासाठी सर्व मतदान केंद्रांवर आवश्यक सुविधा उपलब्ध करून देण्यात आल्या असून कायदा व सुव्यवस्था अबाधित राखण्यासाठी पोलीस यंत्रणा सतर्क आहे. उर्वरित वेळेत मतदानाचा टक्का वाढेल, अशी अपेक्षा व्यक्त करण्यात येत असून नागरिकांनी मोठ्या संख्येने मतदानासाठी बाहेर पडावे, असे आवाहन प्रशासनाच्या वतीने करण्यात आले आहे.