“माझं गाव माझी बातमी इम्पॅक्ट : क्षेत्र–महाबळेश्वर रस्त्यावरील वाहतूक कोंडीला दिलासा; झाडांच्या फांद्या तोडणीला सुरुवात, आता साईड पट्टे रुंदीकरणाची गरज”
महाबळेश्वर प्रतिनिधी –
क्षेत्र–महाबळेश्वर मार्गावर वाढत चाललेल्या भीषण वाहतूक कोंडीवर नागरिकांच्या भावना आणि सततच्या तक्रारींचा परिणाम अखेर प्रत्यक्षात दिसू लागला आहे. ‘माझं गाव माझी बातमी’ने गेल्या काही दिवसांत या समस्येवर सातत्याने प्रकाश टाकत आवाज उठवल्यानंतर नगरपालिका प्रशासनाने आज रस्त्याच्या दोन्ही बाजूंना अनियमितरीत्या वाढलेल्या झाडांच्या फांद्या तोडण्याचे काम हाती घेतले. यामुळे वाहनांना थोडीशी मोकळीक मिळणार असून दीर्घकाळ प्रलंबित असलेल्या अडथळ्यांपैकी एक दूर होत असल्याचे चित्र आहे.
मात्र या प्राथमिक कामामुळे पूर्ण समस्येचे निराकरण होणार नाही, याबाबत स्थानिक नागरिक आणि वाहनचालकांनी स्पष्टपणे मत नोंदवले आहे. मुख्य अडचण म्हणजे रस्त्याच्या दुतर्फा साचलेल्या मातीचे ढीग आणि न भरलेले साईड पट्टे. वर्षानुवर्षे दुर्लक्षित राहिल्याने रस्ता प्रत्यक्षात जितका रुंद आहे त्यापेक्षा कमी रुंद जाणवत आहे. दोन मोठी वाहने समोरासमोर आल्यावर निर्माण होणारी कोंडी, वळणांवरील अडथळे आणि अंधारे कोपरे या सर्वांचा कोंडीत मोठा वाटा आहे. त्यामुळे झाडांची फांदी कापण्याबरोबरच सर्व साईड पट्टे स्वच्छ करून रस्ता पूर्णपणे रुंद करणे अत्यावश्यक आहे.
याचबरोबर पर्यटन हंगाम आणि शालेय सहलींच्या वाढत्या गर्दीने रस्त्यावरील ताण अधिकच वाढवला आहे. शालेय सहलींच्या मोठ्या बसेस रस्त्यावर येताच वाहतूक ठप्प होण्याची वेळ वारंवार आली आहे. या पार्श्वभूमीवर तज्ज्ञांचे मत आहे की सहलींच्या बसेस आणि मोठ्या वाहनांसाठी वन-वे पद्धतीचे नियोजन, वाहतुकीसाठी विशिष्ट वेळा, तसेच पर्यायी मार्गांचा वापर या गोष्टी त्वरित अंमलात आणणे गरजेचे आहे.
वाहतूक कोंडीमुळे दररोज शालेय विद्यार्थी, पर्यटक आणि स्थानिक प्रवासी यांना मोठ्या त्रासाचा सामना करावा लागतो. वाहने अडकून पडणे, वेळेचा अपव्यय, पर्यटकांच्या सहलींचा बोजवारा उडणे—हे सर्व आता नियमित दृश्य झाले आहे. त्यामुळे या रस्त्याचे तातडीने योग्य नियोजन आणि कामे पूर्ण होणे ही वेळेची गरज असल्याचे नागरिकांचे मत आहे.
‘माझं गाव माझी बातमी’ने सातत्याने समस्येचा पाठपुरावा करून प्रशासनाला खडबडून जाग करण्याचे काम केले असून त्याचा पहिला परिणाम आज दिसून आला आहे. मात्र आता नागरिकांना अपेक्षा आहे की फक्त फांद्या कापून थांबणार नाही, तर साईड पट्टे भरून रस्ता रुंद करणे, मोठ्या वाहनांचे नियोजन करणे आणि रस्ता पूर्णपणे सुरळीत करणे या पुढील महत्त्वाच्या पायऱ्याही प्रशासन लवकरच उचलेल.
Comments
Post a Comment