महाबळेश्वरमध्ये MAPCON 2025 संमेलन उत्साहात संपन्न; उपमुख्यमंत्री एकनाथ शिंदे यांची उपस्थिती – डॉक्टर समुदायाशी संवाद साधत भावनिक व राजनीतिक संदेश
जितेंद्र कारंडे,
प्रतापगड प्रतिनिधी
15 नोव्हेंबर 2025
महाराष्ट्र असोसिएशन ऑफ फिजिशियन्स (MAPCON) 2025 या राज्यव्यापी वैद्यकीय संमेलनाला महाबळेश्वर येथे मोठ्या उत्साहात सुरुवात झाली. संमेलनाला महाराष्ट्र राज्याचे उपमुख्यमंत्री एकनाथ शिंदे उपस्थित राहिले आणि त्यांनी उपस्थित असलेल्या डॉक्टर, वैद्यकीय तज्ज्ञ व शेकडो नागरिकांशी मनमोकळा संवाद साधला.
“मी पेशाने डॉक्टर नाही… पण काही मोठी राजकीय ऑपरेशन केली आहेत” — शिंदे
आपल्या भाषणात उपमुख्यमंत्री शिंदे यांनी हलक्या-फुलक्या शैलीत पण प्रभावी शब्दांत राजकीय कारकीर्दीतील अनुभवांचा उल्लेख करत वातावरण रंगवले.
“मी डॉक्टर नाही… पण छोटी-मोठी राजकीय ऑपरेशन सहज करतो. महाराष्ट्राला आवश्यक असलेले मोठे ऑपरेशन मी काही वर्षांपूर्वी यशस्वी केले,” असे म्हणत त्यांनी पूर्वी केलेल्या राजकीय निर्णयांचे महत्त्व अधोरेखित केले.
हृदय शस्त्रक्रियेत 8 हजाराहून अधिक यशस्वी उपचार केलेल्या डॉ. जगदीश हिरेमठ यांचे उपमुख्यमंत्री शिंदे यांनी कौतुक केले.
“तुम्ही हृदय बरे करता… आणि आम्ही कधी कधी लोकांच्या हृदयाचे ठोके चुकवतोही! पण महाराष्ट्राच्या हितासाठी जे लागेल तेच करतो,” या शब्दांत त्यांनी डॉक्टरांच्या सेवाभावाचा गौरव करत स्वतःची भूमिका मिश्कीलपणे स्पष्ट केली.
कोरोना काळात PPE किट घालून रुग्णांना धीर दिल्याची आठवण करून देताना शिंदे यांनी डॉक्टरांना “देवदूत” संबोधले.
“कोरोनाच्या भीषण काळात डॉक्टरांनी हजारो लोकांचे जीव वाचवले. आपल्या धैर्याने संपूर्ण राष्ट्र वाचले,” असे ते म्हणाले.
उपमुख्यमंत्री शिंदे यांनी वैद्यकीय क्षेत्रातील तंत्रज्ञान प्रगतीचे कौतुक करत भविष्याचे चित्रही स्पष्ट केले.
“आर्टिफिशियल इंटेलिजन्समुळे निदानाची अचूकता वाढली”
“टेलीमेडिसिन ग्रामीण भागासाठी वरदान ठरले”
“दूरदूरच्या गावांपर्यंत मोठ्या तज्ज्ञांची मदत पोहोचणे आता शक्य”
डॉक्टरांना भेडसावणाऱ्या अडचणींचे निराकरण करण्याचे आश्वासनही त्यांनी दिले:
“तुमचे प्रश्न आम्ही नक्की प्राधान्याने सोडवू.”
कार्यक्रमात वैद्यकीय क्षेत्रातील अनेक दिग्गजांची उपस्थिती होती:
पालकमंत्री शंभूराज देसाई
जीवनगौरव पुरस्कार विजेते हृदयरोगतज्ज्ञ डॉ. जगदीश हिरेमठ
डॉ. विजयालक्ष्मी बाळेकुंद्रे,डॉ. अलका देशपांडे, डॉ. सुभाष वाघ, डॉ. प्रदीप सिंघल, अंजली राज्याध्यक्ष ,डॉ. उमेश पिंगळे, डॉ. गिरीश राज्याध्यक्ष,डॉ. नारायण देवगावकर, बी.के. महावारकर, सुरेश शिंदे, जे.डी. पोळ, युवराज पवार, सुरेश चव्हाण, डॉ. प्रसाद देशमुख आदी मान्यवर उपस्थित होते.
महाबळेश्वरमध्ये झालेल्या MAPCON 2025 संमेलनाने वैद्यकीय व्यावसायिक, प्रशासकीय यंत्रणा आणि सरकार यांच्यातील संवाद अधिक दृढ केला. वैद्यकीय क्षेत्रातील आधुनिक तंत्रज्ञान, राज्यातील आरोग्य व्यवस्थेतील सुधारणा आणि डॉक्टरांच्या प्रश्नांवर सकारात्मक निर्णय होण्याची अपेक्षा या संमेलनातून अधिक बळकट झाली.
संमेलनातील मान्यवरांची उपस्थिती आणि उपमुख्यमंत्री शिंदे यांचे स्पष्ट व संवादात्मक भाषण यामुळे कार्यक्रमाने महाबळेश्वरच्या सामाजिक-सांस्कृतिक वातावरणाला नवे अधोरेखित केले.
Comments
Post a Comment