वयगाव येथे ‘सुजल संवाद’ कार्यक्रम उत्साहात पार; जलव्यवस्थापनातील वयगावच्या यशाची राष्ट्रीय पातळीवर दखल
✍️विजय जाधव,
सातारा प्रतिनिधी :
जल जीवन मिशन अंतर्गत ग्रामीण पाणीपुरवठा व स्वच्छता व्यवस्थेत समुदाय सहभाग वाढविणे, ‘हर घर जल’ योजनेतील प्रगतीचा आढावा घेणे आणि सेवा वितरण अधिक परिणामकारक करणे या उद्देशाने देशभर राबविण्यात येणाऱ्या ‘सुजल संवाद’ उपक्रमासाठी वाई तालुक्यातील वयगावची निवड झाली आहे. देशभरातील निवडक गावांमध्ये स्थान मिळाल्याने वयगावचा राष्ट्रीय स्तरावर मान उंचावला आहे. येथील पाणीपुरवठा, नळजोडणी, वितरण प्रणाली आणि जलव्यवस्थापनातील समन्वयित प्रयत्नांचे सादरीकरण या कार्यक्रमात विशेष ठरले.
उपकार्यकारी अधिकारी प्रज्ञा भोसले आणि गटविकास अधिकारी विजयकुमार परीट यांच्या मार्गदर्शनाखाली हा संवाद सत्र आयोजित करण्यात आले. पाणीपुरवठा व स्वच्छता समिती, सरपंच, ग्रामपंचायत सदस्य, ग्रामविकास अधिकारी, अंगणवाडी सेविका, आशा सेविका, जलसुरक्षक आणि ग्रामस्थांनी मोठ्या संख्येने सहभाग नोंदवत सक्रिय संवाद व चर्चेत सहभाग घेतला.
जलव्यवस्थापनात वयगावचा आदर्श नमुना
वयगावने लोकसहभागावर आधारित प्रशासकीय कामगिरीत नेहमीच स्वतःची वेगळी ओळख निर्माण केली आहे. ‘हर घर जल’ या उद्दिष्टपूर्तीसाठी गावातील सर्व घटकांनी एकत्रितपणे प्रयत्न केल्याचे या वेळी स्पष्ट झाले.
कार्यक्रमात जलजीवन मिशनच्या अधिकारी रूपाली परीट, पाणीपुरवठा विभागाच्या शुभांगी शेलार, तसेच स्वच्छ भारत मिशनच्या स्वाती जाधव यांनी मार्गदर्शन केले.
त्यांनी —
- नळजोडणीची सद्यस्थिती
- पाणी वितरणाचे वैज्ञानिक नियोजन
- जलस्रोतांचे संवर्धन
- गळती नियंत्रण
- समुदायाधारित पाणी व्यवस्थापनाची गरज
या बाबींवर ग्रामस्थांसह संवाद साधून महत्त्वपूर्ण सूचना दिल्या.
ग्रामस्थांनी मांडलेल्या समस्यांचे निरसन करताना ग्रामस्तरीय जल व्यवस्थापन हा शाश्वत विकासाचा पाया असल्याचे अधिकारीांनी स्पष्ट केले.
‘गुड टच – बॅड टच’ संवेदनशील विषयावर जागृती
गावाच्या सर्वांगीण विकासात योगदान देणाऱ्या वयगावमध्ये विविध सामाजिक व आरोग्यविषयक उपक्रम सातत्याने राबविले जात आहेत. याच अनुषंगाने कार्यक्रमात ‘गुड टच – बॅड टच’ या महत्वाच्या विषयावर सारीका गवते यांनी मुला–मुलींना प्रभावी मार्गदर्शन केले. त्यांनी बालकांवरील अत्याचार प्रतिबंध, सुरक्षित स्पर्श ओळख, स्वतःचे संरक्षण, तसेच पालकांनी घ्यावयाच्या दक्षता उपायांवर माहितीपूर्ण सत्र घेतले.
यासोबतच मुलांमध्ये —
- योग्य आहार
- दैनंदिन व्यायामाचे महत्त्व
- मानसिक आरोग्याची काळजी
यावरही उपयुक्त चर्चा झाली.
गावकऱ्यांचा सहभाग ठरला कार्यक्रमाचे वैशिष्ट्य
कार्यक्रमादरम्यान ग्रामस्थांनी पाणीपुरवठा, स्वच्छता व आरोग्यविषयक प्रश्न मांडले तसेच अधिकारी व समिती सदस्यांनी त्यावर तत्काळ प्रतिसाद देऊन उपाययोजना निश्चित केल्या.
गावाच्या विकास प्रक्रियेत नागरिकांनी दाखविलेला उत्स्फूर्त सहभाग वयगावचा आदर्श ग्रामीण विकास मॉडेल मजबूत करत असल्याचे चित्र या कार्यक्रमातून दिसून आले.
वयगावच्या जलव्यवस्थापनातील प्रयत्नांची दखल राष्ट्रीय पातळीवर घेतली जात असल्याने, इतर ग्रामपंचायतींनाही हा अनुभव लोकसहभाग आणि पारदर्शक व कार्यक्षम प्रशासनाचे उत्कृष्ट उदाहरण म्हणून उपयोगी ठरणार आहे.
Comments
Post a Comment