जिल्हा परिषद व पंचायत समित्यांच्या केंद्रांची व अंतिम मतदार यादी प्रसिद्ध करण्याच्या तारखेत बदल

 जिल्हा परिषद व पंचायत समित्यांच्या केंद्रांची व अंतिम मतदार यादी प्रसिद्ध करण्याच्या तारखेत बदल

सातारा प्रतिनिधी :

 राज्यातील ३२ जिल्हा परिषदा आणि त्याअंतर्गत ३३६ पंचायत समित्यांच्या सार्वत्रिक निवडणुकांची तयारी अंतिम टप्प्यात आहे. राज्य निवडणूक आयोगाच्या आदेशानुसार यापूर्वी जाहीर केलेल्या मतदार यादी तयार करण्याच्या कार्यक्रमामध्ये सुधारणा करण्यात आल्या असून, अंतिम मतदार यादी प्रसिद्ध करण्याच्या दिनांकास मुदतवाढ देण्यात आली आहे.

राज्य निवडणूक आयोगाचे अवर सचिव यांनी दिलेल्या माहितीनुसार, जिल्हा परिषद व पंचायत समिती निवडणुकांसाठी मतदान केंद्रांची यादी आणि मतदान केंद्रनिहाय मतदार यादी प्रसिद्ध करण्याचा टप्पा २७ नोव्हेंबर २०२५ पर्यंत पूर्ण करण्याचा निर्णय घेण्यात आला आहे. पूर्वी निश्चित केलेल्या तारखा काही तांत्रिक कारणांमुळे आणि प्रलंबित कामांमुळे पाळणे कठीण असल्याने आयोगाने ही सुधारित वेळापत्रक जाहीर केले आहे.

मतदार यादीत नावांचा समावेश, वगळणे, दुरुस्ती आणि बदल यांची प्रक्रिया पूर्ण झाल्यानंतर संबंधित जिल्ह्यांत सुधारित व अंतिम सूची प्रसिद्ध करण्यात येणार आहे. यामुळे मतदारांसह निवडणूक लढवू इच्छिणाऱ्या उमेदवारांना योग्य माहिती उपलब्ध होणार असून निवडणूक प्रक्रिया अधिक पारदर्शक आणि शिस्तबद्ध पद्धतीने राबविण्यास मदत होणार आहे.

आयोगाच्या नव्या वेळापत्रकानुसार सर्व जिल्हाधिकारी आणि तहसील कार्यालयांना आवश्यक निर्देश देण्यात आले असून, मतदार नोंदणीसंबंधित कार्ये गतीमान करण्यावर भर देण्यात आला आहे. आगामी निवडणुकांची घोषणा कधीही होऊ शकते, त्यामुळे निवडणूक यंत्रणा सज्ज राहण्याचे आदेशही देण्यात आले आहेत.

राज्यातील ग्रामिण व शहरी भागातील मतदारांनी आपल्या नावांची पडताळणी करावी, आवश्यक असल्यास दुरुस्तीची नोंद करावी, असे आवाहनही निवडणूक आयोगाच्या वतीने करण्यात आले आहे.