महाबळेश्वर नगरपरिषद निवडणूक २०२५ : उमेदवारी अर्ज मागे घेण्याची प्रक्रिया सुरू; पहिल्या दिवशी एकाही उमेदवाराचा अर्ज मागे नाही

महाबळेश्वर नगरपरिषद निवडणूक २०२५ : उमेदवारी अर्ज मागे घेण्याची प्रक्रिया सुरू; पहिल्या दिवशी एकाही उमेदवाराचा अर्ज मागे नाही

✍️राजेश सोंडकर, 

प्रतापगड प्रतिनिधी–

महाबळेश्वर – महाबळेश्वर गिरीस्थान नगरपरिषद सार्वत्रिक निवडणूक २०२५ दरम्यान नामनिर्देशन पत्रांची छाननी प्रक्रिया पूर्ण झाली असून वैध अर्जांची यादी नमुना ४ अ नुसार नगरपरिषद कार्यालयाच्या नोटीस बोर्डवर प्रसिद्ध करण्यात आली आहे. यानंतर आता उमेदवारांसाठी सर्वात महत्त्वाचा टप्पा मानला जाणारा उमेदवारी अर्ज मागे घेण्याचा कालावधी औपचारिकपणे सुरू झाला आहे.

१९ ते २१ नोव्हेंबर : उमेदवारी मागे घेण्याची अधिकृत मुदत

महाबळेश्वर नगरपरिषद कार्यालयात १९ नोव्हेंबर २०२५ ते २१ नोव्हेंबर २०२५ या कालावधीत दुपारी ३.०० वाजेपर्यंत उमेदवारी अर्ज मागे घेण्यासाठी अर्ज स्वीकारले जात आहेत. छाननीतून वैध ठरलेल्या अर्जांपैकी स्पर्धेतून बाहेर पडू इच्छिणाऱ्या उमेदवारांसाठी ही महत्त्वपूर्ण संधी उपलब्ध करण्यात आली आहे.

अपील असलेल्या उमेदवारांसाठी स्वतंत्र मुदत

छाननी निकालावर समाधानी नसलेल्या आणि आपला अर्ज नामंजूर झाल्याची तक्रार असलेल्या उमेदवारांसाठी जिल्हा न्यायाधीशांकडे अपील करण्याची तरतूद ठेवण्यात आली आहे.

अपीलची मुदत : २१/११/२०२५ ते २५/११/२०२५

वैधरित्या नामनिर्देशित उमेदवारांची यादी प्रसिद्ध झाल्यानंतर तीन दिवसांच्या आत अपील करता येईल. अपिलाचा निर्णय ज्या दिवशी होईल त्यानंतर तिसऱ्या दिवशी किंवा तत्पूर्वी – मात्र २५ नोव्हेंबरपर्यंत अर्ज मागे घेण्याची संधी उपलब्ध आहे. निवडणूक निर्णय अधिकाऱ्यांनी अपिलांवरील निर्णय शक्य तितक्या लवकर मिळवून प्रक्रिया सुरू ठेवण्याच्या सूचना दिल्या आहेत.

पहिल्या दिवशी अर्ज मागे घेण्याचा शून्य आकडा

१९ नोव्हेंबर रोजी सकाळी ११ ते दुपारी ३ या वेळेत अर्ज मागे घेण्याची प्रक्रिया सुरू राहिली. मात्र या कालावधीत एकही उमेदवाराने आपला अर्ज मागे घेतलेला नाही.

यामुळे पहिल्या दिवसाचे चित्र स्पष्ट होते की सर्वच उमेदवार अद्याप स्पर्धेत राहण्यास उत्सुक आहेत आणि कोणताही राजकीय उलटफेर घडलेला नाही.

अंतिम यादीकडे सर्वांचे लक्ष

उमेदवारी मागे घेण्याच्या कालावधीनंतर, स्पर्धेत कायम राहिलेल्या उमेदवारांची अंतिम यादी प्रसिद्ध केली जाणार आहे. अंतिम यादी जाहीर झाल्यानंतर महाबळेश्वर नगरपरिषद निवडणुकीचे अंतिम रूप हाती येईल. कोणत्या प्रभागात कोण कोण आमने-सामने आहे, कोणत्या पक्षाची स्थिती मजबूत दिसते आणि स्वतंत्र उमेदवारांचे गणित काय असेल, याचे चित्र पुढील काही दिवसांत अधिक स्पष्ट होणार आहे.

राजकीय दृष्टीने महत्त्वाच्या ठरणाऱ्या या निवडणुकीत पुढील दोन दिवस उमेदवारी मागे घेण्याच्या घडामोडींवर सर्वांचे लक्ष केंद्रीत राहणार आहे.