रात्रीच्या अंधारात माणुसकीचा प्रकाश — पिंपरी तर्फ मेढा गावातील ग्रामस्थांनी पर्यटकांना दिला जीवदान!

📰 रात्रीच्या अंधारात माणुसकीचा प्रकाश — पिंपरी तर्फ मेढा गावातील ग्रामस्थांनी पर्यटकांना दिला जीवदान!

✍️ रवी चव्हाण , 

  मेढा प्रतिनिधी : 

वासोटा किल्ला पाहण्यासाठी पुण्याहून आलेल्या पर्यटकांच्या गाडीला रात्री उशिरा पिंपरी–कुसुबी मार्गावर अडकण्याची वेळ आली. मात्र या संकटसमयी पिंपरी तर्फ मेढा गावातील पोलीस पाटील श्री. प्रवीण संपत पडगळ यांनी दाखवलेली तात्परता आणि ग्रामस्थांची एकजूट यामुळे पर्यटकांचा जीव अक्षरशः “भांड्यात पडला”.

शनिवारी मध्यरात्री साधारण १:३० वाजता, पिंपरी–कुसुबी रस्त्यावर पुलाचे काम सुरू असल्याने वाहनांना वळसा घ्यावा लागत होता. पुण्याहून आलेली पर्यटकांची मिनीबस या रस्त्यावर अडकली. त्यावेळी मुसळधार पाऊस कोसळत होता आणि परिसरात पूर्ण अंधार पसरलेला होता. वाहनात सुमारे २० प्रवासी होते. या अचानक प्रसंगामुळे प्रवाशांमध्ये भीतीचे वातावरण निर्माण झाले.

याची माहिती मिळताच पोलीस पाटील प्रवीण पडगळ यांनी क्षणाचाही विलंब न लावता घटनास्थळी धाव घेतली. त्यांनी प्रथम पर्यटकांना धीर दिला आणि नंतर गावातील ग्रामस्थांना जागे करून मदतीसाठी बोलावले. ग्रामस्थांनीही सामाजिक जबाबदारीची जाणीव ठेवत रात्रीच्या अंधारात व पावसात धाव घेतली.

ट्रॅक्टरच्या साहाय्याने जवळपास दोन तासांच्या अथक प्रयत्नानंतर मिनीबस चिखलातून बाहेर काढण्यात ग्रामस्थांना यश आले. पर्यटकांनी ग्रामस्थांचे व पोलीस पाटील यांचे मनापासून आभार मानले. “एवढ्या रात्री, पावसात, जीव धोक्यात घालून केलेली मदत म्हणजे आजच्या काळातील खरी माणुसकीचे दर्शन आहे,” असे उद्गार त्यांनी काढले.

या प्रसंगाने स्थानिक पातळीवर पोलीस पाटील व ग्रामस्थांविषयी कौतुकाचा वर्षाव होत आहे. गावकऱ्यांनी दाखवलेले एकत्रितपण आणि संकटात दिलेला हात हे ग्रामीण महाराष्ट्रातील संवेदनशीलतेचे जिवंत उदाहरण ठरले आहे.

🌾 अंधारात प्रकाश फुलवणाऱ्या या माणुसकीच्या कृतीसाठी पिंपरी तर्फ मेढा गावातील सर्व ग्रामस्थ आणि पोलीस पाटील प्रवीण पडगळ यांचे मन:पूर्वक अभिनंदन.