संत मोरे माऊली मंदिराचे भव्य उद्घाटन उपमुख्यमंत्री एकनाथ शिंदे यांच्या हस्ते संपन्नराजकीय अधिष्ठानापेक्षा आध्यात्मिक अधिष्ठान श्रेष्ठ — एकनाथ शिंदे

 संत मोरे माऊली मंदिराचे भव्य उद्घाटन उपमुख्यमंत्री एकनाथ शिंदे यांच्या हस्ते संपन्न
राजकीय अधिष्ठानापेक्षा आध्यात्मिक अधिष्ठान श्रेष्ठ — एकनाथ शिंदे

✍️ प्रकाश कदम, 

पोलादपूर प्रतिनिधी 

पंढरपूर (दि. ३ नोव्हेंबर) — वारकऱ्यांच्या भक्तीभावाला समर्पित अशा श्री संत मोरे माऊली संस्थान, शेगाव दुमला येथे नव्याने उभारण्यात आलेल्या श्री संत मोरे माऊली मंदिराचा भव्य उद्घाटन सोहळा उपमुख्यमंत्री तथा शिवसेना पक्षप्रमुख मा. ना. श्री एकनाथ शिंदे यांच्या उपस्थितीत आज अत्यंत भक्तिमय आणि उत्साहवर्धक वातावरणात संपन्न झाला.

सोहळ्याच्या पूर्वसंध्येला संस्थानचे मठाधिपती परमपूज्य श्री दादामहाराज मोरे माऊली यांच्या उपस्थितीत समाधी मंदिराचे उद्घाटन व श्री संत मोरे माऊलींच्या मूर्तीची प्राणप्रतिष्ठा विधी पार पडले. वेदघोष, मंत्रोच्चार आणि पांडुरंगनामाच्या गजरात साकारलेल्या या दिव्य क्षणाचा साक्षीदार होण्याचे भाग्य लाभल्याचे समाधान उपमुख्यमंत्री एकनाथ शिंदे यांनी व्यक्त केले.

वारकरी परंपरेचा गौरव : आध्यात्मिकतेचा उत्सव

उपमुख्यमंत्री शिंदे आपल्या भाषणात म्हणाले, “आषाढी आणि कार्तिकी वारी ही वारकऱ्यांसाठी खरी दिवाळी असते. वारी म्हणजे भक्ती, शिस्त आणि सामाजिक एकतेचा संगम. वारकऱ्यांच्या सेवेतील प्रत्येक क्षण हा पुण्याचा मानला जातो. म्हणूनच राज्य शासनाने वारकऱ्यांच्या सेवेसाठी स्वच्छता, पाणीपुरवठा, आरोग्य सुविधा आणि चंद्रभागेच्या तीरावर आवश्यक सर्व सोयी उपलब्ध करून दिल्या आहेत.”

ते पुढे म्हणाले, “राजकीय अधिष्ठानापेक्षा आध्यात्मिक अधिष्ठान अधिक श्रेष्ठ आहे, यावर माझा ठाम विश्वास आहे. समाजात संतांनी दिलेल्या विचारांचा आणि वारकरी संप्रदायाच्या साधनेचा प्रसार झाला पाहिजे. ही आपली खरी संस्कृती आणि अस्मिता आहे.”

शेतकऱ्यांसाठी दिलासा – कर्जमाफीचा मोठा निर्णय

शिंदे यांनी आपल्या भाषणात राज्यातील शेतकऱ्यांबाबत महत्त्वाचे निर्णय अधोरेखित करताना सांगितले, “वारकरी हे शेतकरीच असतात. बळीराजाच्या वेदना आम्ही समजतो. त्यामुळे राज्य शासनाने ३२ हजार कोटी रुपयांच्या मदतीचा निर्णय घेतला आहे. तसेच जून २०२६ पर्यंत संपूर्ण कर्जमाफी लागू करण्याचा निर्धार शासनाने केला आहे. बळीराजाचे दुःख दूर व्हावे, त्याच्या शेतात आणि जीवनात आनंदाचे पीक यावे, अशी प्रार्थना मी पांडुरंगाच्या चरणी करतो.”

भक्तिमय वातावरणात जनसागर

या सोहळ्याला मठाधिपती परमपूज्य श्री दादामहाराज मोरे माऊली, अमृताचार्य महाराज, रोजगार हमी मंत्री भरतशेठ गोगावले, गृहराज्यमंत्री योगेश कदम, माजी मंत्री तानाजी सावंत, संजय कदम, आमदार अभिजित पाटील, चंद्रकांत कळंबे, जिल्हाधिकारी कुमार आशीर्वाद, तसेच वारकरी संप्रदायातील अनेक संतप्रभु, मान्यवर आणि हजारो भाविक उपस्थित होते.

मंदिर परिसर दिवसभर हरिनाम संकीर्तन, कीर्तन-भजन, ढोल-ताशांचा निनाद आणि पालख्यांच्या आगमनाने दुमदुमून गेला होता. वारकऱ्यांच्या जयजयकारात आणि “मोरे माऊलींच्या” गजरात भक्तांचा उत्स्फूर्त सहभाग पाहायला मिळाला.

या भव्य उद्घाटन सोहळ्याने शेगाव दुमला परिसरात भक्ती, समता आणि आध्यात्मिक आनंदाचे वातावरण निर्माण केले. मंदिराचे हे नव्याने उभारलेले रूप वारकरी संप्रदायासाठी नवचैतन्य घेऊन येईल, अशी भावना सर्वत्र व्यक्त होत होती.

---