सुयोग खांडसकरचा पाण्यात बुडून दुर्दैवी मृत्यू कासरूड (ता. महाबळेश्वर) येथील दुर्दैवी घटना

 सुयोग खांडसकरचा पाण्यात बुडून दुर्दैवी मृत्यू

 कासरूड (ता. महाबळेश्वर) येथील दुर्दैवी घटना 

✍️ जितेंद्र करंडे, 

प्रतापगड प्रतिनिधी – 

महाबळेश्वर तालुक्यातील कासरूड गावातील १८ वर्षीय सुयोग विजय खांडसकर या तरुणाचा शुक्रवारी दुपारी पाण्यात बुडून दुर्दैवी मृत्यू झाला. सुयोग हा मुंबईमध्ये शिक्षणासाठी वास्तव्यास होता. काही दिवसांच्या सुट्ट्यांसाठी तो आपल्या गावी, कासरूड येथे आला होता.

शुक्रवारी दुपारी तो आपल्या काही मित्रांसोबत जवळील कोयना नदीपात्राजवळ फिरायला गेला होता.  उकाड्यामुळे सर्वांनी पोहायला जाण्याचे ठरवले. पोहत असताना सुयोग अचानक खोल पाण्यात गेला आणि बुडू लागला. मित्रांनी आरडाओरडा करून मदत मागितली, पण तोपर्यंत उशीर झाला होता. काही वेळानंतर गावकऱ्यांच्या मदतीने त्याला बाहेर काढण्यात आले, मात्र तोपर्यंत त्याचा मृत्यू झाला होता.

घटनेची माहिती मिळताच स्थानिक पोलिसांनी घटनास्थळी धाव घेतली आणि पंचनामा करून मृतदेह पुढील तपासासाठी रवाना केला. पोलिसांच्या प्राथमिक तपासानुसार ही अपघाती घटना असल्याचे समोर आले आहे.

या दुर्दैवी घटनेने कासरूड गावात शोककळा पसरली आहे. सुयोग हा नम्र, अभ्यासू आणि सर्वांना प्रेमाने वागणारा मुलगा म्हणून ओळखला जात होता. त्याच्या अचानक जाण्याने गावातील सर्वजण हळहळ व्यक्त करत आहेत. खांडसकर कुटुंबावर दुःखाचा डोंगर कोसळला असून गावात शोकमय वातावरण निर्माण झाले आहे.