महाबळेश्वर गिरिस्थान नगरपरिषद सार्वत्रिक निवडणूक २०२५नामनिर्देशन पत्र दाखल प्रक्रियेसाठी मार्गदर्शन बैठक उद्या

महाबळेश्वर गिरिस्थान नगरपरिषद सार्वत्रिक निवडणूक २०२५
नामनिर्देशन पत्र दाखल प्रक्रियेसाठी मार्गदर्शन बैठक उद्या

✍️ जितेंद्र करंडे,

 प्रतापगड प्रतिनिधी – 

महाबळेश्वर – महाबळेश्वर गिरिस्थान नगरपरिषद सार्वत्रिक निवडणूक २०२५ च्या पार्श्वभूमीवर नामनिर्देशन पत्र दाखल करण्याच्या प्रक्रियेबाबत मार्गदर्शन व चर्चा करण्यासाठी महत्त्वपूर्ण बैठक आयोजित करण्यात आली आहे. या बैठकीचे आयोजन निवडणूक निर्णय अधिकारी, महाबळेश्वर गिरिस्थान नगरपरिषद यांच्या कार्यालयातर्फे करण्यात आले असून, ही बैठक शनिवार, दिनांक ८ नोव्हेंबर २०२५ रोजी सकाळी ११ वाजता खादी ग्रामोद्योग सभागृह, महाबळेश्वर येथे होणार आहे.

या बैठकीत सर्व तालुकाध्यक्ष, शहराध्यक्ष, विविध राजकीय पक्षांचे पदाधिकारी, इच्छुक उमेदवार तसेच पत्रकारांनी उपस्थित राहावे, असे आवाहन निवडणूक निर्णय अधिकारी श्री. सचिन मस्के यांनी केले आहे.

निवडणूक निर्णय अधिकाऱ्यांच्या कार्यालयाकडून मिळालेल्या माहितीनुसार, महाबळेश्वर गिरिस्थान नगरपरिषद सार्वत्रिक निवडणूक २०२५ चा कार्यक्रम ४ नोव्हेंबर रोजी जाहीर झाला असून, त्यानुसार १० नोव्हेंबरपासून नामनिर्देशन पत्र दाखल करण्याची कार्यवाही सुरू होणार आहे. या पार्श्वभूमीवर, उमेदवारांना नामनिर्देशन प्रक्रियेदरम्यान आवश्यक कागदपत्रे, अर्ज भरण्याची पद्धत, नियम, वेळापत्रक आणि कायदेशीर बाबींबाबत सविस्तर मार्गदर्शन या बैठकीत केले जाणार आहे.

बैठकीच्या सुचारू आयोजनासाठी नोडल अधिकारी (निवडणूक विषयक बैठक व पत्रकार परिषद पथक) श्री. अमित माने यांना आवश्यक ती सर्व व्यवस्था करण्याचे आदेश देण्यात आले आहेत. संबंधित राजकीय पदाधिकारी व पत्रकारांना या बैठकीची माहिती देण्याची जबाबदारीदेखील त्यांच्याकडे सोपविण्यात आली आहे.

ही बैठक निवडणुकीसंदर्भात होणाऱ्या पुढील सर्व टप्प्यांसाठी दिशा ठरविणारी ठरणार असल्याने सर्व संबंधितांनी वेळेवर उपस्थित राहणे अत्यावश्यक आहे.

या संदर्भातील परिपत्रक दिनांक ६ नोव्हेंबर २०२५ रोजी जावक क्र. निवडणूक/१३/२०२५ असा क्रमांक देऊन जारी करण्यात आले आहे.

महाबळेश्वरमध्ये वाढत्या राजकीय तापमानाच्या पार्श्वभूमीवर ही बैठक विशेष लक्षवेधी ठरण्याची शक्यता असून, येथील आगामी निवडणुकीच्या तयारीसाठी ती एक महत्त्वपूर्ण टप्पा मानला जात आहे.