गावकऱ्यांच्या तत्परतेला वन विभागाची साथ; कोल्ह्याचा जीव वाचला
कराड प्रतिनिधी:
कराड तालुक्यातील कोळेवाडी येथील गोसावी मळा शिवारात बुधवारी सकाळी एका विहिरीत कोल्हा पडल्याची घटना उघडकीस आली. वेळेत मदत मिळाल्याने वन विभागाने राबविलेल्या धाडसी मोहिमेत हा कोल्हा सुखरूप वाचविण्यात आला. या रेस्क्यू ऑपरेशनचे गावकऱ्यांनी मोठे कौतुक केले आहे.
शेतातील विहिरीत एक कोल्हा तडफडत असल्याचे स्थानिकांना दिसल्यावर त्यांनी तत्काळ शेतमालकाला माहिती दिली. परिस्थितीचे गांभीर्य ओळखून शेतकऱ्याने गावातील पोलीस पाटलांशी संपर्क साधला. पोलीस पाटलांनी तातडीने वन विभागाला ही बाब कळवली. काही वेळातच वनपरिक्षेत्र अधिकारी कराड यांच्या मार्गदर्शनाखाली वन विभागाचे पथक घटनास्थळी दाखल झाले. यावेळी वन विभागासोबत डब्ल्यू आर के (WRK) टीमचे सदस्यही मदतीसाठी उपस्थित होते.
विहिरीची खोली आणि बचावाची कठीण परिस्थिती लक्षात घेऊन सापळा पद्धतीने रेस्क्यू मोहीम राबविण्यात आली. जीवाची पर्वा न करता वनकर्मचाऱ्यांनी विहिरीत उतरून कोल्ह्याला सुरक्षितरीत्या दोरीच्याआधारे वर खेचले. काही वेळातच हा कोल्हा सुखरूप बाहेर काढण्यात यश आले. थोडा वेळ विश्रांती घेतल्यानंतर तो स्वतःहून शेतातून मोकळ्या जागेकडे धावत निसटला.
वन विभागाने त्याची शारीरिक तपासणी करून तो कोणत्याही दुखापतीशिवाय सक्षम असल्याचे स्पष्ट केले. त्यानंतर त्याला नैसर्गिक अधिवासात सोडण्यात आले. या संपूर्ण मोहिमेदरम्यान ग्रामस्थांनी जागरूकता व संयम दाखविल्यामुळे अडथळा न होता रेस्क्यू यशस्वी झाला.
ग्रामस्थांनी वन विभागाच्या या कार्याची प्रशंसा करताना सांगितले, “वन विभाग आणि WRK टीमने अत्यंत धाडसाने आणि तत्परतेने कार्य केले. त्यांची ही सेवा अभिमानास्पद आहे.”
या बचाव मोहिमेत वनरक्षक, वनकर्मी, स्थानिक शेतकरी आणि गावकऱ्यांचा समन्वय विशेष ठरला.
Comments
Post a Comment