सुंदरराव मोरे महाविद्यालयात आजीवन अध्ययन विभागाचे प्रथम सत्र प्रशिक्षण यशस्वीरीत्या संपन्नविद्यार्थ्यां मध्ये संवाद कौशल्य, सामाजिक जाण आणि प्रकल्प नियोजनाची प्रेरणा

सुंदरराव मोरे महाविद्यालयात आजीवन अध्ययन विभागाचे प्रथम सत्र प्रशिक्षण यशस्वीरीत्या संपन्न

विद्यार्थ्यांमध्ये संवाद कौशल्य, सामाजिक जाण आणि प्रकल्प नियोजनाची प्रेरणा

प्रकाश कदम,

पोलादपूर प्रतिनिधी :

शिवाई शिक्षण प्रसारक मंडळ, महाड संचलित सुंदरराव मोरे महाविद्यालय, पोलादपूर येथील आजीवन अध्ययन व विस्तार कार्य विभागाचे प्रथम सत्र प्रशिक्षण शिबिर उत्साहपूर्ण वातावरणात संपन्न झाले. विद्यार्थ्यांच्या सर्वांगीण विकासासाठी तसेच समाजाशी निगडित समस्यांचे भान निर्माण करण्यासाठी या प्रशिक्षण सत्राचे आयोजन करण्यात आले होते.

कार्यक्रमाच्या प्रारंभी विभागाचे कार्यक्रम अधिकारी प्रा. मनोज भगत यांनी सर्वांचे स्वागत करून प्रास्ताविक केले. त्यांनी आजीवन अध्ययन विभागाच्या कार्यपद्धती, उद्दिष्टे आणि या सत्रातील विविध उपक्रमांची रूपरेषा यांची सविस्तर माहिती दिली.

या सत्राचे प्रमुख मार्गदर्शक म्हणून उपस्थित असलेले डॉ. नाथिराम राठोड, कार्यक्रम अधिकारी आणि आजीवन अध्ययन विभागाचे क्षेत्रीय समन्वयक, यांनी विद्यार्थ्यांना महत्त्वपूर्ण मार्गदर्शन केले. त्यांनी विभागाच्या पर्यावरण शिक्षण, करिअर प्रोजेक्ट आणि अन्नपूर्णा अशा विविध प्रकल्पांविषयी सविस्तर माहिती देत सांगितले की — “या प्रकल्पांद्वारे विद्यार्थी समाजातील वास्तव समस्यांचा अभ्यास करून त्यावर व्यावहारिक उपाययोजना मांडतील. सर्वेक्षण, मुलाखती आणि क्षेत्रभेटींच्या माध्यमातून विद्यार्थ्यांनी समाजजीवनाचा प्रत्यक्ष अनुभव घ्यावा, हेच आजीवन अध्ययनाचे सार आहे.”

डॉ. राठोड यांनी पुढे “उडान महोत्सव” या विभागाच्या आगामी उपक्रमाची माहितीही विद्यार्थ्यांना दिली आणि या उपक्रमात सक्रिय सहभाग घेण्याचे आवाहन केले.

कार्यक्रमाचे अध्यक्षीय मनोगत महाविद्यालयाचे उपप्राचार्य डॉ. महेश वल्ले यांनी व्यक्त केले. त्यांनी आपल्या भाषणात विद्यार्थ्यांना संवाद कौशल्य, सांघिक कार्याची जाणीव आणि प्रकल्प अहवाल तयार करण्यातील संशोधनात्मक दृष्टिकोन आत्मसात करण्याचे महत्त्व पटवून दिले. “प्रत्येक प्रकल्प अहवाल हा फक्त शैक्षणिक दस्तऐवज नसून समाजाशी संवाद साधणारे माध्यम आहे,” असे डॉ. वल्ले यांनी नमूद करत विद्यार्थ्यांना या संधीचा गांभीर्यपूर्वक लाभ घेण्याचे आवाहन केले.

कार्यक्रमाचे सूत्रसंचालन आणि आभार प्रदर्शन प्रा. मनोज भगत यांनी केले. या प्रशिक्षण सत्रात आजीवन अध्ययन विभागाचे विद्यार्थी मोठ्या संख्येने उपस्थित होते.

या शिबिरातून विद्यार्थ्यांमध्ये सामाजिक जाणीव, सर्जनशील विचार आणि प्रकल्प नियोजनाची कार्यक्षम दृष्टिकोन विकसित करण्याचा प्रयत्न यशस्वीपणे साधला गेला.