वरिष्ठ सहाय्यक महिला २५ हजारांची लाच घेताना रंगेहात पकडली. लाचलुचपत प्रतिबंधक विभाग, सातारा यांची कारवाई — शिक्षण विभागातील भ्रष्टाचारावर मोठा लगाम

वरिष्ठ सहाय्यक महिला २५ हजारांची लाच घेताना रंगेहात पकडली
लाचलुचपत प्रतिबंधक विभाग, सातारा यांची कारवाई — शिक्षण विभागातील भ्रष्टाचारावर मोठा लगाम

 सातारा प्रतिनिधी : गाव माझी बातमी, 

सातारा — “प्रामाणिकपणे काम करा, लाच घेऊ नका” असा संदेश देण्यासाठी शासन सतत मोहिमा राबवत असताना, सातारा जिल्हा परिषद शिक्षण विभागातील एका वरिष्ठ महिला सहाय्यकाने थेट “साहेबांना देण्यासाठी” म्हणून लाच मागितल्याचे उघड झाले आहे. अखेर लाचलुचपत प्रतिबंधक विभाग, सातारा यांनी या महिलेवर कारवाई करत तिला २५ हजार रुपयांची लाच स्वीकारताना रंगेहात पकडले आहे. या घटनेमुळे शिक्षण विभागातील भ्रष्टाचाराच्या प्रवृत्तीवर पुन्हा एकदा प्रश्नचिन्ह निर्माण झाले आहे.

प्राप्त माहितीनुसार, तक्रारदार हे सेवानिवृत्त शिक्षक असून, त्यांनी आपल्या २४ वर्षांच्या सेवेनंतर निवड श्रेणी प्रस्ताव मंजुरीसाठी जिल्हा परिषद सातारा शिक्षण अधिकारी (माध्यमिक) कार्यालयात प्रस्ताव दाखल केला होता. या प्रस्तावाच्या मंजुरीबाबत चौकशी करण्यासाठी ते कार्यालयात गेले असता, वरिष्ठ सहाय्यक वैशाली शंकर माने (वय ४०, रा. क्षेत्रमाहुली, ता.जि. सातारा) यांनी “साहेबांना देण्यासाठी” म्हणून २५,००० रुपयांची मागणी केली.

तक्रारदारांना ही मागणी अन्यायकारक वाटल्याने त्यांनी तत्काळ लाचलुचपत प्रतिबंधक विभाग, सातारा येथे तक्रार नोंदवली. पोलीस निरीक्षक प्रविण निंबाळकर यांच्या मार्गदर्शनाखाली तक्रारीची पडताळणी करण्यात आली. त्यानंतर २७ आणि २८ ऑक्टोबर रोजी योजनाबद्ध सापळा रचण्यात आला. या दरम्यान आरोपी महिलेने तक्रारदाराकडून २५ हजार रुपये स्वीकारताच, विभागाच्या अधिकाऱ्यांनी पंचासमक्ष तिला रंगेहात पकडले.

या कारवाईनंतर आरोपीविरुद्ध सातारा शहर पोलीस ठाण्यात भ्रष्टाचार प्रतिबंधक कायद्यान्वये गुन्हा दाखल करण्याची प्रक्रिया सुरू आहे. तपास पोलीस निरीक्षक सुनिल पाटील करत असून, संपूर्ण कारवाई पोलीस उप-अधीक्षक दयानंद गावडे (ला.प्र.वि. पुणे) यांच्या मार्गदर्शनाखाली पार पडली. या यशस्वी सापळा कारवाईत मपो. हवालदार गोरे, मपो. शि. माकर, पो. शि. महामुलकर आणि चा. पो. हवालदार दिवेकर यांनी सक्रिय सहभाग घेतला.

पोलीस अधीक्षक शिरीष सरदेशपांडे आणि अपर पोलीस अधीक्षक अर्जुन भोसले यांच्या मार्गदर्शनाखाली ही कारवाई पार पडल्याचे लाचलुचपत प्रतिबंधक विभागाने सांगितले.

ही घटना समोर आल्यानंतर जिल्हा परिषद शिक्षण विभागात मोठी खळबळ उडाली आहे. अनेक शिक्षकांनी या कारवाईचे स्वागत करत “सेवकांना न्याय मिळावा, आणि भ्रष्ट अधिकाऱ्यांना शिक्षा व्हावी” अशी मागणी केली आहे.

ही कारवाई प्रशासनातील प्रामाणिक अधिकाऱ्यांसाठी प्रेरणादायी ठरत असून, भ्रष्टाचाराच्या साखळीवर नियंत्रण आणण्याच्या दिशेने एक महत्त्वपूर्ण पाऊल ठरल्याचे नागरिकांचे मत आहे.