युथ ऑलिम्पिकसाठी टीम इंडियाची बहारदार तयारी – महाराष्ट्राचा अभिमान ठरला अथर्व सकपाळ
जितेंद्र कारंडे,
प्रतापगड. प्रतिनिधी–
आगामी एशियन युथ ऑलिम्पिक स्पर्धा बहरैन येथे होत असून या स्पर्धेसाठी टीम इंडिया आज बहरैनसाठी रवाना होत आहे. या भारतीय तुकडीतून महाराष्ट्राला अभिमान वाटावा अशी भर पडली आहे. मुंबईतील दिंडोशी विभागातून आणि मूळ गाव महाबळेश्वर तालुक्यातील वेळापूर येथील कुमार अथर्व विनायक सकपाळ यांची ‘इंडिया टेक बॉल टीम’ मध्ये भव्य निवड झाली आहे. त्यांच्या या उज्ज्वल यशाबद्दल त्यांचे सर्व स्तरातून अभिनंदन होत आहे.
अथर्व हे श्री विनायक किसन सकपाळ (उपशाखाप्रमुख, दिंडोशी विभाग – मुंबई) यांचे चिरंजीव असून बालपणापासूनच खेळ क्षेत्रात त्यांची विशेष प्रगती होत आली आहे. टेक बॉल हा भारतात झपाट्याने लोकप्रिय होऊ लागलेला खेळ आहे. टेबल टेनिसच्या टेबलासारख्या वक्र पृष्ठभागावर खेळला जाणारा, फुटबॉल नियंत्रण कौशल्य असलेला हा अनोखा खेळ जगभर प्रसिद्ध होत असून अशा महत्त्वाच्या खेळात भारतीय संघात महाराष्ट्रातील युवकाची थेट निवड होणे ही कौतुकास्पद बाब आहे.
अथर्व सकपाळ यांनी राज्यस्तरीय तसेच राष्ट्रीय स्तरावर विविध स्पर्धांमध्ये उल्लेखनीय कामगिरी करत प्रशिक्षकांचे लक्ष वेधले होते. त्यांचा शिस्तबद्ध सराव, तांत्रिक तयारी आणि जिद्दीच्या बळावर ते भारतीय टेक बॉल संघात स्थान मिळवण्यात यशस्वी झाले.
या यशाबद्दल अथर्व यांचे वडील श्री विनायक सकपाळ यांनी सांगितले की,
"अथर्वने कठोर परिश्रम, चिकाटी आणि देशासाठी खेळण्याची तळमळ यामुळे हे यश मिळवले आहे. महाराष्ट्र आणि महाबळेश्वरचा झेंडा जागतिक पातळीवर नेण्याची त्याची जिद्द आहे. आगामी स्पर्धांमध्ये देशाला सुवर्णयश मिळवून देण्याचा तो प्रयत्न करेल."
स्थानिक गाव वेळापूर तसेच महाबळेश्वर तालुक्यातील क्रीडा क्षेत्रातील कार्यकर्त्यांनीही अथर्वच्या कामगिरीचे कौतुक केले आहे. दिंडोशी विभागातील सामाजिक आणि क्रीडा मंडळांचे पदाधिकारीही या गौरवाबद्दल कृतज्ञता आणि अभिमान व्यक्त करत आहेत.
भारतीय संघाचे प्रशिक्षक मंडळींच्या मते,
"अथर्व शिस्तप्रिय, जिद्दी आणि तांत्रिकदृष्ट्या परिपक्व खेळाडू असून भविष्यात भारतीय टेक बॉल क्षेत्रातील मोठे नाव ठरेल."
टीम इंडिया बहरैनमध्ये 10 हून अधिक देशांशी टेक बॉल स्पर्धा खेळणार आहे. भारताला सुवर्णपदकाची आशा असताना, अथर्व सकपाळकडूनही उल्लेखनीय कामगिरीची अपेक्षा व्यक्त केली जात आहे.
हार्दिक शुभेच्छा
अथर्व विनायक सकपाळ यांना एशियन युथ ऑलिम्पिक – टेक बॉल स्पर्धेसाठी खूप खूप शुभेच्छा!
त्यांचे हे यश भावी पिढीसाठी प्रेरणादायी ठरो, अशा शुभेच्छा विविध मान्यवर आणि नागरिकां कडून व्यक्त होत आहेत. 💐🇮🇳
Comments
Post a Comment