ताणतणाव व्यवस्थापन आणि सायबर सुरक्षा जनजागृती कार्यक्रम उत्साहात संपन्नजागतिक मानसिक आरोग्य दिनानिमित्त उपक्रम — जिल्हा विधी सेवा प्राधिकरणाचा उपक्रम कौतुकास्पद
जागतिक मानसिक आरोग्य दिनानिमित्त उपक्रम — जिल्हा विधी सेवा प्राधिकरणाचा उपक्रम कौतुकास्पद
सातारा, प्रतिनिधी दि. 13 –
जागतिक मानसिक आरोग्य दिनाच्या निमित्ताने जिल्हा विधी सेवा प्राधिकरण, सातारा यांच्या संयुक्त विद्यमाने “ताणतणाव व्यवस्थापन आणि सायबर सुरक्षा” या विषयावर जनजागृतीपर कार्यक्रमाचे आयोजन करण्यात आले. या कार्यक्रमाचे अध्यक्षस्थानी प्रमुख जिल्हा व सत्र न्यायाधीश तथा जिल्हा विधी सेवा प्राधिकरणाचे अध्यक्ष श्री. ए. एस. वाघमारे हे होते. त्यांच्या मार्गदर्शनाखाली हा उपक्रम उपयुक्त आणि माहितीपूर्ण ठरला.
हा कार्यक्रम जिल्हा विधी सेवा प्राधिकरणाच्या सभागृहात पार पडला. कार्यक्रमाला प्राधिकरणाच्या सचिव सौ. निना नि. बेदरकर, आंतरराष्ट्रीय योग समुपदेशक तज्ञ डॉ. धनश्री पाटील, तसेच सायबर शाखेतील पोलिस हवालदार अतुला तावरे आणि वर्षा खोचे यांनी मार्गदर्शन केले.
ताणतणाव व्यवस्थापनावरील मार्गदर्शन
डॉ. धनश्री पाटील यांनी दैनंदिन जीवनातील वाढती स्पर्धा, कामाचा ताण, वैयक्तिक जबाबदाऱ्या यामुळे निर्माण होणारा मानसिक तणाव कसा हाताळावा याची सखोल माहिती दिली. त्यांनी योग, प्राणायाम, ध्यान, सकारात्मक विचार आणि वेळेचे नियोजन या माध्यमातून मानसिक आणि शारीरिक आरोग्य टिकविण्याचे मार्ग उपस्थितांसमोर मांडले.
“मन निरोगी तर शरीर निरोगी” या संकल्पनेवर विशेष भर देत तणावाचे व्यवस्थापन हेच आयुष्यातील संतुलित जगण्याचे रहस्य असल्याचे त्या म्हणाल्या.
सायबर सुरक्षेबाबत जागरूकतेचे आवाहन
सायबर पोलिस हवालदार अतुला तावरे आणि वर्षा खोचे यांनी वाढत्या डिजिटल वापराच्या युगात सायबर गुन्ह्यांचा धोका वाढत असल्याचे सांगितले. ऑनलाईन फसवणूक, डिजिटल अरेस्ट, फेक कॉल, केवायसी स्कॅम, यूपीआय आणि बँकिंग फ्रॉड यांसारख्या घटनांपासून कसे सावध राहावे याबाबत त्यांनी माहिती दिली.
सायबर गुन्ह्यांपासून बचावासाठी खालील उपाय सुचविण्यात आले:
- अनोळखी दुवे (links) किंवा फसवे कॉल टाळा
- कोणालाही OTP, बँक तपशील देऊ नका
- “तत्काळ पैसे पाठवा” अशा दबावाच्या संदेशांपासून सावध राहा
- सायबर गुन्हा घडल्यास www.cybercrime.gov.in वर त्वरित तक्रार नोंदवा
कार्यक्रमाचे संचालन
कार्यक्रमाचे प्रास्ताविक अॅड. सुचिता पाटील, सहाय्यक विधी सहाय्य बचाव सल्लागार यांनी केले. या कार्यक्रमास जिल्हा न्यायालय, सातारा येथील महिला कर्मचारी मोठ्या संख्येने उपस्थित होत्या. कार्यक्रमाचे सूत्रसंचालन देखील त्यांनीच करत उपस्थितांचे आभार मानले.
जागतिक मानसिक आरोग्य दिनानिमित्त राबविण्यात आलेला हा उपक्रम मानसिक आरोग्य आणि सायबर सुरक्षितता या दोन्ही महत्त्वाच्या विषयांबाबत अत्यंत उपयुक्त आणि जनजागृतीपर ठरला, अशी प्रतिक्रिया उपस्थितांनी दिली. जिल्हा विधी सेवा प्राधिकरणाने अशा उपयुक्त कार्यक्रमांचे आयोजन पुढील काळातही करावे, अशी अपेक्षा व्यक्त करण्यात आली.
Comments
Post a Comment