उपमुख्यमंत्री एकनाथ शिंदे दरेगाव येथे हेलिकॉप्टरने दाखल – दोन दिवसांचा सातारा जिल्हा दौरा सुरू

उपमुख्यमंत्री एकनाथ शिंदे दरेगाव येथे हेलिकॉप्टरने दाखल – दोन दिवसांचा सातारा जिल्हा दौरा सुरू

जितेंद्र कारंडे,

प्रतापगड प्रतिनिधी: 

महाराष्ट्र राज्याचे उपमुख्यमंत्री एकनाथ शिंदे यांचा दोन दिवसांचा सातारा जिल्हा दौरा आजपासून सुरू झाला आहे. महाबळेश्वर तालुक्यातील दरेगाव येथील हेलिपॅडवर ते हेलिकॉप्टरद्वारे नुकतेच दाखल झाले. त्यांच्या आगमनानंतर स्थानिक शिवसेना नेत्या-कार्यकर्त्यांनी मोठ्या उत्साहात स्वागत केले. जिल्ह्यातील राजकीय घडामोडी, विशेषतः नुकत्याच जाहीर झालेल्या पंचायत समिती व जिल्हा परिषद आरक्षणाच्या पार्श्वभूमीवर शिंदे यांचा हा दौरा अत्यंत महत्त्वाचा मानला जात आहे.

उपमुख्यमंत्र्यांच्या आगमनावेळी विस्तृत पोलीस बंदोबस्त तैनात करण्यात आला होता. दरेगावात त्यांच्या मुक्कामाची व्यवस्था करण्यात आली असून ते रात्री येथेच विश्रांती घेणार आहेत. महाबळेश्वर परिसरात त्यांच्या आगमनानंतर राजकीय वातावरणाला चैतन्य आलं आहे.

---

उद्या साताऱ्यात शिवसेना मेळावा – शिंदे यांचे मार्गदर्शन

उद्या (दिनांक १५) सातारा शहरात शिवसेना (शिंदे गट) तर्फे भव्य मेळाव्याचे आयोजन करण्यात आले आहे. या मेळाव्यास उपमुख्यमंत्री शिंदे सकाळी ११ वाजता उपस्थित राहणार असून कार्यकर्त्यांना मार्गदर्शन करणार आहेत. सातारा जिल्ह्यातील आगामी राजकीय समीकरणांच्या दृष्टीने या मेळाव्याकडे संपूर्ण जिल्ह्याचे लक्ष लागले आहे.

---

दिवसभर विकासकामांचा आढावा

उपमुख्यमंत्री शिंदे आपल्या सातारा दौऱ्यात विविध विकास प्रकल्पांची पाहणी, आढावा बैठक व सार्वजनिक बांधकाम विभाग तसेच ग्रामीण विकास विभागाच्या अधिकाऱ्यांसोबत चर्चासत्र घेणार आहेत. सातारा जिल्ह्यातील पायाभूत सुविधा, रस्ते कामे, ग्रामीण भागातील पाणीपुरवठा योजना, पर्यटनविकास आदी विषयांवर सविस्तर चर्चा अपेक्षित आहे.

---

आरक्षण सोडतीच्या पार्श्वभूमीवर दौऱ्याला विशेष महत्त्व

जिल्हा परिषद व पंचायत समिती निवडणुकांसाठी नुकत्याच जाहीर झालेल्या आरक्षण सोडतीनंतर जिल्हा राजकारणात चांगलेच हलचल निर्माण झाली आहे. विविध गट-तटांमध्ये हालचालींना वेग आला असून या पार्श्वभूमीवर उपमुख्यमंत्र्यांचा हा दौरा निर्णायक ठरण्याची शक्यता राजकीय क्षेत्रात व्यक्त केली जात आहे.

---

स्थानिक जनतेत उत्सुकता

खूप दिवसांनंतर शिंदे महोदय महाबळेश्वर तालुक्यातील मुक्कामी आले असल्याने दरेगाव परिसरासह संपूर्ण तालुक्यात त्यांच्या दौऱ्याबद्दल जनतेत व कार्यकर्त्यांमध्ये मोठी उत्सुकता दिसून येत आहे. आज सायंकाळी काही स्थानिक नेत्यांची त्यांच्यासोबत बैठक होण्याची माहिती सूत्रांनी दिली आहे.

---

दरेगावातूनच उद्या साताऱ्याकडे प्रस्थान
उपमुख्यमंत्री शिंदे उद्या सकाळी दरेगाव येथूनच साताऱ्याकडे रवाना होणार असून दौऱ्याचा पुढील कार्यक्रम शिवसेना मेळावा तसेच प्रशासकीय बैठकांभोवती राहणार आहे.