महाबळेश्वर तालुका पंचायत समिती सदस्यपद आरक्षण सोडत जाहीर — तहसीलदार सचिन मस्के यांच्या नेतृत्वाखाली प्रक्रिया पार पडणार
विलास काळे,
महाबळेश्वर प्रतिनिधी :
महाबळेश्वर तालुका पंचायत समितीच्या आगामी निवडणुकीसाठी सदस्यपदाच्या जागांचे आरक्षण निश्चित करण्यासाठी आरक्षण सोडत जाहीर करण्यात आली आहे. महाबळेश्वरचे तहसीलदार सचिन मस्के यांच्या नेतृत्वाखाली ही सोडत पार पडणार आहे. यासंदर्भातील अधिकृत जाहीर प्रकटन ६ ऑक्टोबर २०२५ रोजी तहसील कार्यालयामार्फत प्रसिद्ध करण्यात आले आहे.
सोडतीचा कार्यक्रम तपशील:
अ.क्र. पंचायत समितीचे नाव सभेचे ठिकाण तारीख व वेळ
१ महाबळेश्वर खादी ग्रामोद्योग मंडळ सभागृह, मधसंचलनालय, बंगला क्र. ५, महाबळेश्वर
दि. १३ ०ऑक्टोबर २०२५, सकाळी ११.३० वा.
तहसीलदार मस्के यांनी दिलेल्या माहितीनुसार, ही आरक्षण सोडत महाराष्ट्र जिल्हा परिषदा व पंचायत समित्या अधिनियम, १९६१ आणि महाराष्ट्र जिल्हा परिषदा आणि पंचायत समित्या (जागांच्या आरक्षणाची पद्धत व चक्रानुक्रम) नियम, २०२५ नुसार करण्यात येत आहे.
या प्रक्रियेद्वारे अनुसूचित जाती, अनुसूचित जमाती, नागरिकांचा मागासवर्ग प्रवर्ग (OBC) तसेच त्यामधील महिलांसाठी आणि सर्वसाधारण प्रवर्गातील महिलांसाठी राखीव ठेवण्यात येणाऱ्या जागांची निश्चिती केली जाणार आहे.
नागरिकांना आवाहन:
तहसीलदार सचिन मस्के यांनी जिल्हा परिषद किंवा पंचायत समिती सदस्यपदासाठी इच्छुक असलेल्या सर्व नागरिकांना १३ ऑक्टोबर रोजी सभेला उपस्थित राहण्याचे आवाहन केले आहे. या सोडतीनंतर प्रारूप आरक्षण यादी प्रसिद्ध करण्यात येईल व त्यावर हरकती आणि सूचना दाखल करण्यासाठी मुदत देण्यात येईल. त्यामुळे नागरिकांनी प्रशासनाच्या पुढील सूचनांकडे लक्ष ठेवावे, असेही त्यांनी नमूद केले आहे.
तहसीलदार सचिन मस्के यांच्या कार्याचा आढावा:
महाबळेश्वरचे तहसीलदार म्हणून सचिन मस्के यांनी यापूर्वीही ग्रामपंचायत सरपंच पदाची आरक्षण सोडत यशस्वीपणे पार पाडली आहे. तसेच, आंबेनळी घाट दरडप्रकरणात वाहतूक सुरक्षेसाठी तत्काळ निर्णय घेऊन प्रशासनिक तत्परता दाखवली होती.
तसेच ‘सेवा पंधरवडा अभियान’ यशस्वीरीत्या राबवून नागरिक सहभाग वाढविण्यासाठी त्यांनी विशेष प्रयत्न केले होते.
या पार्श्वभूमीवर, महाबळेश्वर तालुका पंचायत समितीची ही आरक्षण सोडत प्रक्रिया पारदर्शक, नियमानुसार आणि लोकसहभागातून पार पडेल, असा विश्वास स्थानिक नागरिक व प्रशासन व्यक्त करत आहेत.
Comments
Post a Comment