महाबळेश्वर तालुका पंचायत समिती निवडणूक – तळदेव गणात सत्तासंघर्षाची तयारी.
✍️जितेंद्र कारंडे –प्रतापगड प्रतिनिधी :
ओपन (सर्वसाधारण) आरक्षण असलेल्या तळदेव गणात महाबळेश्वर तालुका पंचायत समितीच्या निवडणुकीसाठी राजकीय तापमान वाढले आहे. मागील निवडणुकीत राष्ट्रवादी काँग्रेसच्या अंजली कदम यांनी येथे विजय मिळवला होता, परंतु सध्याच्या बदललेल्या राजकीय परिस्थितीत पुन्हा एकदा सत्तासंघर्ष तीव्र होण्याची चिन्हे दिसत आहेत.
राजकीय ओळख आणि प्रभावी घराणे
तळदेव गण फक्त मतदारसंख्येमुळेच नाही, तर राजकीय दिग्गजांच्या उपस्थितीमुळेही महत्त्वाचे मानले जाते.
या गणाशी संबंधित काही प्रमुख व्यक्तिमत्त्वे –
- उपमुख्यमंत्री एकनाथ शिंदे यांचे गाव
- राष्ट्रवादी काँग्रेसचे तालुका अध्यक्ष बाबुराव सपकाळ
- माजी आमदार स्व. जी. जी. कदम
- माजी पंचायत समिती सभापती धोंडीराम जंगम
- शिवसेनेचे माजी आमदार दगडू दादा सपकाळ
अशा दिग्गजांच्या उपस्थितीमुळे तळदेव गण महाबळेश्वर तालुक्याच्या राजकारणाची धुरी मानला जातो.
विकासाचा अजेंडा की परंपरागत निष्ठा?
उपमुख्यमंत्री एकनाथ शिंदे यांच्या थेट लक्षात असलेला तळदेव तापोळा परिसर गेल्या काही वर्षांत अनेक रस्ते, पूल आणि पर्यटन विकासाच्या योजना राबवल्यामुळे बदलला आहे. या विकासकामांमुळे स्थानिकांमध्ये शिंदे गटाविषयी सकारात्मक मत आहे.
परंतु या गणात अजूनही कदम, सपकाळ आणि जाधव गटांची पारंपरिक पकड मजबूत आहे. त्यामुळे निवडणुकीत “विकासाचा प्रभाव की पारंपरिक निष्ठा” या प्रश्नावर मत देण्याची परिस्थिती निर्माण झाली आहे.
शिवसेना (शिंदे गट) – उमेदवारांची तयारी
शिवसेनेने तळदेव गणात उमेदवारीसाठी जोरदार तयारी सुरू केली आहे. संभाव्य उमेदवारांमध्ये –
- गणेश उतेकर – तालुकाप्रमुख, स्थानिक संपर्क मजबूत
- विशाल सपकाळ
- अजित सपकाळ
- बजरंग सपकाळ
यामध्ये गणेश उतेकर आघाडीवर असल्याचे बोलले जात आहे.
राष्ट्रवादी काँग्रेस (अजित पवार गट) – संघटना मजबूत
राष्ट्रवादी काँग्रेसकडून उमेदवार निवडताना मोठा डावपेच अपेक्षित आहे. संभाव्य इच्छुक –
- सागर कदम – युवा उद्योजक, स्थानिक संपर्क राजेंद्र शेठ राजपुरे कट्टर समर्थक
- संजूबाबा गायकवाड – माजी सभापती, ओबीसी आरक्षणामुळे सभापती पदासाठी दावेदार
जाणकारांचे मत आहे की संजूबाबा गायकवाड यांना उमेदवारी मिळण्याची शक्यता जास्त आहे.
महाविकास आघाडी – उमेदवार शोध चालू
महाविकास आघाडी (शिवसेना उद्धव गट, काँग्रेस, राष्ट्रवादी शरद पवार गट) तळदेव गणात सामाईक उमेदवार देण्याचा प्रयत्न करत आहे. मात्र आघाडीतील चर्चा अजूनही सुरू असल्यामुळे अंतिम निर्णय धूसर आहे.
भाजप – खेळी प्रतीक्षेत
भाजपने तळदेव गणात उमेदवार देण्याची घोषणा केली आहे. मात्र अद्याप नाव निश्चित झालेले नाही. स्थानिक चर्चेनुसार काही संभाव्य उमेदवारांवर विचार सुरू आहे.
अपक्ष उमेदवार – समीकरण बदलू शकणारे
सुभाष कदम अपक्ष म्हणून मैदानात उतरू इच्छितात . त्यांच्या स्थानिक प्रभावामुळे अपक्ष उमेदवार निकालावर ठसा उमठवू शकतात अशी चर्चा आहे.
निष्कर्ष
तळदेव गणातील निवडणूक राजकीय प्रतिष्ठेची थरारक लढत ठरणार आहे.
- शिंदे गट – विकास आणि सत्ता प्रभाव
- राष्ट्रवादी काँग्रेस – मजबूत संघटन, पारंपरिक पकड
- महाविकास आघाडी – मतविभाजन रोखण्याचा प्रयत्न
- अपक्ष उमेदवार – स्थानिक पातळीवरील रोषाचे प्रतिनिधित्व
तळदेव गणातील जनतेचा कौल कोणाकडे जाईल, विकासाचा मुद्दा जिंकतो की पारंपरिक गटांचा प्रभाव? हे पाहणे आता उत्सुकतेचे ठरणार आहे.
–माझं गाव माझी बातमी ✍️
Comments
Post a Comment