जिल्हा परिषदा व पंचायत समित्या – आरक्षण सोडतीसाठी विशेष सभा जाहीर१३ ऑक्टोबर रोजी सोडत प्रक्रिया पार पडणार; जिल्हाधिकारी संतोष पाटील यांची माहिती

जिल्हा परिषदा व पंचायत समित्या – आरक्षण सोडतीसाठी विशेष सभा जाहीर
१३ ऑक्टोबर रोजी सोडत प्रक्रिया पार पडणार; जिल्हाधिकारी संतोष पाटील यांची माहिती

सातारा प्रतिनिधी : 

महाराष्ट्र जिल्हा परिषदा व पंचायत समित्या अधिनियम, 1961 आणि महाराष्ट्र जिल्हा परिषदा व पंचायत समित्या (जागांच्या आरक्षणाची पद्धत व चक्रानुक्रम) नियम, 2025 नुसार जिल्हा परिषदा व पंचायत समित्यांतील आरक्षित जागांची सोडत १३ ऑक्टोबर २०२५ रोजी आयोजित करण्यात आली आहे. याबाबत सविस्तर माहिती जिल्हाधिकारी संतोष पाटील यांनी निवेदनाद्वारे दिली.

आरक्षण सोडतीचा उद्देश

या विशेष सभांद्वारे अनुसूचित जाती (SC), अनुसूचित जमाती (ST), नागरिकांचा मागासवर्ग (OBC) तसेच या प्रवर्गातील महिलांसाठी राखीव जागा निश्चित केल्या जाणार आहेत. यासोबतच सर्वसाधारण महिला आरक्षणाच्या जागांची देखील सोडत पद्धतीने निवड केली जाणार आहे.

सोडत प्रक्रियेचे आयोजन – तालुकानिहाय कार्यक्रम

जिल्ह्यातील जिल्हा परिषद व सर्व पंचायत समित्यांसाठी एकाच दिवशी – दि. १३ ऑक्टोबर २०२५ रोजी सकाळी ११.३० वाजता — विशेष सभा घेतल्या जाणार आहेत. त्यानुसार सभा स्थळे व संस्था पुढीलप्रमाणे:

क्र.	संस्था	सभा स्थळ
1	सातारा जिल्हा परिषद	नियोजन भवन, जिल्हाधिकारी कार्यालय, सातारा
2	खंडाळा पंचायत समिती	तहसिल कार्यालय, खंडाळा
3	फलटण पंचायत समिती	सजाई गार्डन मंगल कार्यालय, जाधववाडी (फलटण)
4	माण पंचायत समिती	तहसिल कार्यालय सभागृह, दहिवडी
5	खटाव पंचायत समिती	पंचायत समिती सभागृह, खटाव
6	कोरेगाव पंचायत समिती	तहसिल कार्यालय, कोरेगाव
7	वाई पंचायत समिती	देशभक्त किसनवीर सभागृह, पंचायत समिती, वाई
8	महाबळेश्वर पंचायत समिती	मध संचालनालय, महाबळेश्वर
9	जावली पंचायत समिती	पंचायत समिती सभागृह, मेढा
10	सातारा पंचायत समिती	स्व. आ. श्रीमंत छ. अभयसिंहराजे भोसले सभागृह
11	पाटण पंचायत समिती	लोकनेते बाळासाहेब देसाई कृषी संकूल, काळोली
12	कराड पंचायत समिती	स्व. यशवंतराव चव्हाण सभागृह (टाऊन हॉल), कराड

सर्वांसाठी सहभागाची संधी

आरक्षण सोडत प्रक्रिया पारदर्शकपणे पार पडावी यासाठी या विशेष सभांना सर्वसामान्य नागरिक, लोकप्रतिनिधी, सामाजिक संघटना तसेच इच्छुक व्यक्तींना उपस्थित राहण्याचे आवाहन करण्यात आले आहे. या सभांना उपस्थित राहणाऱ्या नागरिकांकडून आवश्यक त्या सूचना, मते किंवा हरकती स्वीकारण्यात येऊ शकतात, असे जिल्हाधिकारी पाटील यांनी स्पष्ट केले.

ही आरक्षण सोडत स्थानिक स्वराज्य संस्थांच्या लोकशाही प्रक्रियेत महत्त्वाचा टप्पा असून, येणाऱ्या जिल्हा परिषद व पंचायत समिती निवडणुकांसाठी याकडे जिल्ह्यातील राजकीय तसेच सामाजिक क्षेत्राचे लक्ष वेधले गेले आहे.

---