महाबळेश्वर नगराध्यक्ष पदासाठी आरक्षण जाहीर : शहरातील राजकारणात नवचैतन्य, तिन्ही आघाड्यांमध्ये उमेदवारांच्या चर्चेला वेग

महाबळेश्वर नगराध्यक्ष पदासाठी आरक्षण जाहीर : शहरातील राजकारणात नवचैतन्य, तिन्ही आघाड्यांमध्ये उमेदवारांच्या चर्चेला वेग

विलास काळे,

महाबळेश्वर प्रतिनिधी : 

गेल्या अनेक दिवसांपासून संपूर्ण महाबळेश्वर शहराचे लक्ष लागून राहिलेल्या थेट जनतेतून निवडल्या जाणाऱ्या नगराध्यक्षपदाच्या आरक्षणाचा निर्णय अखेर जाहीर झाला असून, या पदासाठी सर्वसाधारण (पुरुष) हे आरक्षण जाहीर झाले आहे. या निर्णयामुळे शहरातील अनेक दिग्गज आणि इच्छुक नेत्यांमध्ये प्रचंड उत्साहाचे वातावरण निर्माण झाले आहे. मात्र, गेल्या अनेक वर्षांपासून नगराध्यक्ष पदापासून वंचित राहिलेल्या इतर मागासवर्गीय समाजात निराशा पसरली आहे.

🔹 आठ वर्षांचा राजकीय प्रवास

गेल्या आठ वर्षांत महाबळेश्वर नगरपालिकेच्या सत्तेचा प्रवास अनेक वळणांनी भरलेला आहे. सुरुवातीची अडीच वर्षे राष्ट्रवादी काँग्रेसच्या आमदार गटाकडे सत्ता होती. त्यानंतर शहराच्या विकासाच्या दृष्टीने तत्कालीन नगराध्यक्षांनी भाजपात प्रवेश केला, ज्यामुळे पुढील अडीच वर्षे भाजपकडे सत्तेची धुरा गेली. या कार्यकाळानंतर नगरपरिषद सुमारे तीन वर्षे प्रशासकीय राजवटीखाली गेली होती.

🔹 आता तिन्ही आघाड्यांची तयारी

नगराध्यक्ष पदाचे आरक्षण जाहीर झाल्यानंतर शहरातील राजकारणात नवा उत्साह निर्माण झाला असून, आता तीन प्रमुख आघाड्या रिंगणात उतरण्याची चिन्हे दिसत आहेत —

1. आमदार पुरस्कृत राष्ट्रवादी काँग्रेस गट
2. महाविकास आघाडी (राष्ट्रवादी, काँग्रेस व उद्धव ठाकरे गट)
3. शिवसेना शिंदे गट

या तिन्ही आघाड्यांनी आपले डावपेच आखण्यास सुरुवात केली असून, आरक्षण जाहीर झाल्यामुळे आता या हालचालींना वेग येणार आहे.

🔹 संभाव्य उमेदवारांची चर्चा जोरात

आरक्षण जाहीर झाल्यानंतर नगराध्यक्षपदाच्या निवडणुकीत अनेक दिग्गज रिंगणात उतरण्याची शक्यता व्यक्त होत आहे. शहरातील राजकीय वर्तुळात खालील नावांची जोरदार चर्चा सुरू आहे —

• राष्ट्रवादी काँग्रेस (आमदार गट) : दत्ता वाडकर, सुनील शिंदे, विशाल तोष्णीवाल, नासिर मुलानी, माजी नगराध्यक्षा विमल पारठे
• शिवसेना (शिंदे गट) : स्वप्नाली शिंदे, विमल ओंबळे
• महाविकास आघाडी : माजी नगराध्यक्ष डी. एम. बावळेकर, राजेश कुंभारदरे

सध्याच्या राजकीय परिस्थितीत राष्ट्रवादी काँग्रेसकडे उमेदवारांची संख्या व संघटनशक्ती दोन्ही अधिक असल्याचे दिसून येत आहे, तर महाविकास आघाडी व शिवसेना शिंदे गटाकडे प्रत्येकी दोन पर्याय उपलब्ध आहेत.

🔹 अटीतटीची निवडणूक अपेक्षित

या वेळीची नगराध्यक्ष निवडणूक केवळ सत्तेसाठी नव्हे तर अस्तित्वासाठीची लढत ठरणार असल्याची राजकीय वर्तुळातील चर्चा आहे. प्रत्येक गटासाठी ही निवडणूक प्रतिष्ठेची ठरणार असून, पुढील काही दिवसांत सत्तांतराच्या समीकरणांवर आणि गटबांधणीवर महाबळेश्वरकरांचे डोळे खिळलेले राहणार आहेत.

शहरातील नागरिक आता एकच प्रश्न विचारताना दिसत आहेत —

“या वेळेस नगराध्यक्षपद कोणाच्या गळ्यातील माळ ठरणार?”