सुंदरराव मोरे महाविद्यालयात संतुलित आहार विषयक मार्गदर्शन कार्यक्रम संपन्न. तरुणाईने जंक फूडपासून दूर राहून पोषक आहार स्वीकारण्याची गरज – प्रा. स्नेहल कांबळे
तरुणाईने जंक फूडपासून दूर राहून पोषक आहार स्वीकारण्याची गरज – प्रा. स्नेहल कांबळे
प्रकाश कदम,
पोलादपूर प्रतिनिधी (ता. ११ ऑक्टोबर २०२५) :
शिवाई शिक्षण प्रसारक मंडळ, महाड संचालित सुंदरराव मोरे कला, वाणिज्य व विज्ञान महाविद्यालय, पोलादपूर येथे राष्ट्रीय सेवा योजना (NSS) विभागातर्फे आरोग्य जनजागृती अभियानांतर्गत ‘संतुलित आहार – आरोग्यदायी जीवनाची गुरुकिल्ली’ या विषयावर मार्गदर्शनपर कार्यक्रम आयोजित करण्यात आला. या उपक्रमासाठी महाविद्यालयाचे प्राचार्य प्रा. सुनील बलखंडे यांचे मार्गदर्शन लाभले.
कार्यक्रमाच्या सुरुवातीला कार्यक्रम अधिकारी डॉ. राम बरकुले यांनी प्रास्ताविकातून कार्यक्रमाचे उद्दिष्ट स्पष्ट केले. आधुनिक युगातील बदललेली जीवनशैली, वाढत्या फास्टफूड संस्कृतीमुळे तरुण पिढी आज विविध आरोग्य समस्यांना सामोरे जात असल्याचे त्यांनी नमूद केले. "आहाराचे शास्त्र समजून घेतल्यास शरीर निरोगी राहते आणि करिअर घडविण्याची क्षमता वाढते," असे डॉ. बरकुले म्हणाले.
कार्यक्रमामध्ये प्रमुख मार्गदर्शन प्रा. स्नेहल कांबळे (सहाय्यक प्राध्यापिका, रसायनशास्त्र विभाग) यांनी केले. त्यांनी संतुलित आहाराची मूलभूत संकल्पना समजावताना कार्बोहायड्रेट्स, प्रथिने, जीवनसत्त्वे, खनिजे व पाण्याचे प्रमाण योग्य प्रमाणात घेणे किती महत्त्वाचे आहे याचे विश्लेषण केले.
> “ॲडव्हान्स जीवनशैलीच्या नादात तरुण पिढी जंक फूड आणि पॅकेज्ड फूडच्या आहारी जात आहे. या पदार्थांमुळे शरीराची रोगप्रतिकारशक्ती कमी होते. आपले पूर्वसुरी जसे घरचे पौष्टिक, ताजे अन्न खात होते तसेच अन्न सेवन करणे हेच उत्तम आरोग्याचे रहस्य आहे,” असे प्रा. कांबळे यांनी सांगितले.
त्यांनी विशेषतः कोकणातील मुलींमध्ये वाढत चाललेली रक्तक्षय (Anaemia) ही गंभीर आरोग्य समस्या असल्याचे नमूद करत यावर उपाय सुचवले. हिमोग्लोबिनची कमतरता भरून काढण्यासाठी गूळ, शेंगदाणे, हरभरा, हिरव्या पालेभाज्या, खजूर, तिळ यांसारख्या पदार्थांचे सेवन आवश्यक असल्याचे त्यांनी सांगितले. तसेच कॅल्शियम आणि लोहयुक्त आहार नियमित घेण्याचा सल्लाही दिला.
कार्यक्रमाच्या शेवटी प्रा. डॉ. शैलेश जाधव यांनी उपस्थितांचे आभार मानले. कार्यक्रमाला विद्यार्थी, एनएसएस स्वयंसेवक, शिक्षकवर्ग यांची उत्स्फूर्त उपस्थिती लाभली.
---
कार्यक्रमातील ठळक मुद्दे
आरोग्यदायी आहार ही प्रत्येक विद्यार्थ्याची प्राथमिक गरज
जंक फूड आणि कोल्डड्रिंक्सपासून दूर राहण्याचे आवाहन
घरगुती पारंपरिक आहारातून पोषणमूल्यांची पूर्तता
विद्यार्थ्यांमध्ये आरोग्यजागृती वाढवण्याचे उद्दिष्ट
मुलींमध्ये हिमोग्लोबिन वाढवण्यासाठी पौष्टिक आहाराचे मार्गदर्शन
-
Comments
Post a Comment