रहिमतपूर (कोरेगाव तालुका) – जमीन वादातून भाजप पदाधिकाऱ्यावर कोयत्याने जीवघेणा हल्ला, परिसरात तणाव

रहिमतपूर (कोरेगाव तालुका) – जमीन वादातून भाजप पदाधिकाऱ्यावर कोयत्याने जीवघेणा हल्ला, परिसरात तणाव

सातारा प्रतिनिधी –

कोरेगाव तालुक्यातील जयपूर परिसरात जमीन वादातून झालेल्या हल्ल्यात भाजपाच्या रहिमतपूर मंडळ पंचायतराज ग्रामविकास विभागाचे अध्यक्ष सोमनाथ कृष्णात निकम गंभीर जखमी झाले आहेत. हा प्रकार रविवारी (दि.१९) दुपारी शिवनेरी शुगर्स साखर कारखान्याच्या कार्यक्षेत्रात घडला असून या हल्ल्यामुळे रहिमतपूर सह परिसरात प्रचंड खळबळ उडाली आहे. या प्रकरणी एकसळ येथील पैलवान सचिन शेलार यांच्यावर कोयत्याने वार केल्याचा आरोप जखमी निकम यांचे भाऊ श्रीकांत निकम यांनी केला आहे.

घटनेचा तपशील

मिळालेल्या माहितीनुसार, सोमनाथ निकम यांची शेती शिवनेरी शुगर्स कारखान्याच्या हद्दीत आहे. कारखाना उभारणीच्या काळापासूनच त्यांच्या जमिनीबाबत कारखाना व्यवस्थापनासोबत वाद सुरू होता. निकम यांनी आपल्या मालकीतील काही जमीन कारखान्यास वापरासाठी उपलब्ध करून दिली होती. मात्र, या जमिनीवर परवानगीशिवाय काँक्रिटीकरणाचे काम सुरु असल्याची माहिती मिळताच, सोमनाथ निकम व त्यांचे बंधू श्रीकांत निकम घटनास्थळी गेले.

निकम यांनी कारखाना प्रशासनाला काँक्रिटीकरणाचा मुद्दा उपस्थित करत आक्षेप घेतल्यावर वाद चिघळला. याच दरम्यान पैलवान सचिन शेलार सह सहा ते सात जण तेथे आले. या गटातील दोन जणांनी श्रीकांत निकम यांना पकडून ठेवले, तर सचिन शेलार यांनी धारदार कोयत्याने सोमनाथ निकम यांच्या डोक्यावर प्राणघातक वार केल्याचा आरोप श्रीकांत यांनी केला आहे.

उपचार सुरू, अद्याप पोलिसात गुन्हा नोंद नाही

हल्ल्यानंतर गंभीर जखमी अवस्थेत सोमनाथ निकम यांना तात्काळ रहिमतपूर प्राथमिक आरोग्य केंद्रात दाखल करण्यात आले. तेथून प्राथमिक उपचारानंतर पुढील उपचारासाठी त्यांना सातारा जिल्हा शासकीय रुग्णालयात हलवण्यात आले आहे. त्यांची प्रकृती गंभीर असल्याचे वैद्यकीय सूत्रांनी सांगितले.

दरम्यान, या घटनेची नोंद अद्याप रहिमतपूर पोलिस ठाण्यात झालेली नाही. मात्र, या घटनेनंतर परिसरात तणावाचे वातावरण निर्माण झाले असून पोलिसांकडून परिस्थितीवर नियंत्रण ठेवण्यासाठी हालचाली केल्या जात आहेत.

पुढील कारवाईची प्रतीक्षा

जमीन वादाच्या पार्श्वभूमीवर झालेला हा हल्ला कारखाना व्यवस्थापनावरील प्रश्नचिन्ह निर्माण करणारा ठरत आहे. जखमींच्या नातेवाईकांनी आरोपींवर कठोर कारवाईची मागणी केली आहे. पोलिसांचे अधिकृत बयान येणे बाकी असून प्रकरण अधिक गुंतागुंतीचे असल्याचे संकेत मिळत आहेत.