महाबळेश्वर : इनर व्हील क्लबच्यावतीने केक बनविण्याचे प्रात्यक्षिक; विद्यार्थिनींना कौशल्यविकासाचा अनोखा अनुभव

महाबळेश्वर : इनर व्हील क्लबच्यावतीने केक बनविण्याचे प्रात्यक्षिक; विद्यार्थिनींना कौशल्यविकासाचा अनोखा अनुभव

✍️ प्रेषित गांधी , 

महाबळेश्वर प्रतिनिधी – 

महाबळेश्वर (दि. २९ ऑक्टोबर) – इनर व्हील क्लब ऑफ महाबळेश्वरच्यावतीने गिरिस्थान महाविद्यालयातील विद्यार्थिनींसाठी “केक बनविण्याचे प्रात्यक्षिक व कार्यशाळा” आयोजित करण्यात आली. या उपक्रमाचा उद्देश विद्यार्थिनींना घरगुती पातळीवर कमी खर्चात व सोप्या पद्धतीने स्वादिष्ट केक बनविण्याचे कौशल्य आत्मसात करता यावे, तसेच त्यांच्या स्वावलंबन क्षमतेत भर पडावी, हा होता.

कार्यशाळेत क्लबच्या सचिव सपना अरोरा यांनी विद्यार्थिनींना केक बनविण्याची सविस्तर माहिती दिली. त्यांनी परवडणाऱ्या व सहज उपलब्ध साहित्याचा वापर करून स्वादिष्ट केक तयार करण्याची सोपी कृती प्रत्यक्ष दाखवून दिली. त्यांच्या मार्गदर्शनाखाली विद्यार्थिनींनी उत्साहाने सहभाग घेत विविध फ्लेवर्सचे केक तयार करण्याचा प्रयत्न केला.

कार्यशाळेदरम्यान वातावरणात उत्साह आणि आनंद भरून राहिला होता. विद्यार्थिनींसाठी विविध मजेदार खेळांचे आयोजन करण्यात आले होते. या खेळांमधील विजेत्या विद्यार्थिनींना आकर्षक भेटवस्तू देऊन सन्मानित करण्यात आले.

या कार्यक्रमाला इनर व्हील क्लबच्या अध्यक्षा वर्षा पार्टे, सदस्य नीता वाकले, मंजिरी कुलकर्णी, सीमा पाटील, संगीता शहा आदी उपस्थित होत्या. उपस्थितांनी विद्यार्थिनींशी संवाद साधून अशा उपक्रमांमुळे मुलींमध्ये सर्जनशीलता, आत्मविश्वास आणि व्यावहारिक कौशल्य वाढीस लागते, असे मत व्यक्त केले.

या उपयुक्त व आनंददायी कार्यशाळेमुळे विद्यार्थिनींना कौशल्यवर्धनाचा आणि आत्मनिर्भरतेचा प्रेरणादायी अनुभव मिळाला.

---