आंबेनळी घाटात भीषण अपघात – संरक्षक कठड्यामुळे मोठी दुर्घटना टळली

आंबेनळी घाटात भीषण अपघात – संरक्षक कठड्यामुळे मोठी दुर्घटना टळली

जितेंद्र कारंडे,

प्रतापगड प्रतिनिधी –

आंबेनळी घाटात आज सकाळी सुमारास अकरा वाजताच्या दरम्यान झालेल्या अपघातात एक मोठी दुर्घटना थोडक्यात टळली. पोलादपूरकडून वेगाने येणाऱ्या क्रेटा गाडीने महाबळेश्वरकडून येणाऱ्या एका टुरिस्ट टॅक्सीला समोरून जोरदार धडक दिली.

मिळालेल्या माहितीनुसार, क्रेटा गाडीतील चालकाने वळणावर वेग नियंत्रित न ठेवल्याने हा अपघात झाला. घाटातील तीव्र वळणांमुळे वाहनाचा तोल जाऊन टुरिस्ट टॅक्सीला जोरदार धडक बसली. घाटातील संरक्षक कठडे (सुरक्षा तटबंदी) असल्याने टॅक्सी थेट दरीत कोसळण्यापासून वाचली, अन्यथा मोठी जीवितहानी झाली असती.

या अपघातात टॅक्सीतील काही पर्यटक किरकोळ जखमी झाले असून त्यांच्यावर महाबळेश्वर ग्रामीण रुग्णालयात प्राथमिक उपचार सुरू आहेत. सुदैवाने कोणत्याही प्रवाशाचा जीवितहानीचा धोका नसल्याची माहिती पोलिसांनी दिली.

घटनेची माहिती मिळताच पोलिसांनी तात्काळ घटनास्थळी धाव घेतली असून अपघातग्रस्त वाहने बाजूला करून वाहतूक सुरळीत करण्यात आली आहे. आंबेनळी घाटातील अरुंद वळणांवर अनेकदा अपघात घडत असल्याने घाटातील वाहनचालकांनी वेग नियंत्रणात ठेवण्याचे आवाहन स्थानिक प्रशासनाकडून करण्यात येत आहे.