भिलार–मेढा रोडवर पुन्हा बिबट्यांची दहशत; दोन बछड्यांचा व्हिडिओ व्हायरल

भिलार–मेढा रोडवर पुन्हा बिबट्यांची दहशत; दोन बछड्यांचा व्हिडिओ व्हायरल

 जितेंद्र कारंडे, 

प्रतापगड प्रतिनिधी –

महाबळेश्वर तालुक्यात बिबट्याची दहशत कमी होताना दिसत नाही. नुकतीच सोनट गावात झालेल्या वन्यजीव हल्ल्यात राघू जानू कदम या शेतकऱ्याचा मृत्यू झाला ही घटना अजून ताजी असताना, भिलार–मेढा रोड परिसरात रविवारी रात्री बिबट्याच्या दोन बछड्यांचे दर्शन झाल्याने नागरिक पुन्हा दहशतीच्या सावटाखाली आले आहेत.

भिलारचे रहिवासी रोहित आनंदा भिलारे हे रात्रीच्या सुमारास आपल्या शेताकडे जात असताना रस्त्याच्या कडेला दोन बछडे बसलेले दिसून आले. त्यांनी त्याचा व्हिडिओ काढून सोशल मीडियावर शेअर केला व काही क्षणात तो व्हायरल झाला.

यापूर्वीही भिलार परिसरात बिबट्यांनी पशुधन व कुत्र्यांवर हल्ले केल्याच्या घटना समोर आल्या आहेत. त्यामुळे गावात व पर्यटकांमध्ये मोठी चिंता कायम आहे. काही महिन्यांपूर्वी पांगारे गावाजवळदेखील बिबट्याचे दर्शन झाले होते. त्या व्हिडिओनेही सोशल मीडियावर चांगलीच चर्चा रंगवली होती.

वन विभागावरील निष्क्रियतेचा आरोप

स्थानिक नागरिकांनी वनविभागाकडे वारंवार तक्रारी दिल्या असूनही

“वनविभागाचा प्रतिसाद संथ व निष्क्रिय आहे”

असे ग्रामस्थांचे म्हणणे आहे.

बिबट्यांचा वावर वाढला असतानाच पिंजऱ्यांची संख्या अपुरी आहे. सतत गस्त न ठेवणे, प्रकाशव्यवस्थेचा अभाव आणि जनजागृती कमी — अशा अनेक त्रुटींबाबत लोक आक्रोश व्यक्त करत आहेत.

पर्यटन हंगाम शिगेला – सुरक्षिततेचा प्रश्न गंभीर

दिवाळीच्या पार्श्वभूमीवर भिलार–मेढा मार्गावरून

पर्यटकांची मोठ्या प्रमाणावर ये-जा सुरू आहे.

निसर्ग समृद्ध असलेल्या महाबळेश्वर तालुक्यात

वन्यजीवांचे अस्तित्व हे वैशिष्ट्य असले तरी

आज या भागातील लोक दहशतीत जगत आहेत

ही बाब निश्चितपणे चिंताजनक आहे.

दरम्यान, व्हायरल झालेल्या व्हिडिओची वनविभाग चौकशी करत असून

बिबट्यांचा वावर अचूक ओळखण्यासाठी गस्त वाढवण्यात आल्याचे सांगण्यात येत आहे.

तत्काळ ठोस उपाययोजनेची मागणी

राघू कदम यांचा मृत्यू आणि आता पुन्हा

बिबट्यांचे बछडे रस्त्यावर आढळल्याने

स्थानिक संताप वाढत असून :

 “दहशतीची छाया दूर व्हावी,

पिंजरे लावावेत,

आणि ठोस उपाय तत्काळ राबवावेत.”

अशी मागणी ग्रामस्थ व लोकप्रतिनिधींकडून जोर धरत आहे.