इनर व्हील क्लब महाबळेश्वरतर्फे नवरात्र विशेष सामाजिक उपक्रम“सन्मान मानकरणीचा” सोहळ्यात गृहसेविकांचा गौरव – ४० प्रेशर कुकरांचे वितरण

इनर व्हील क्लब महाबळेश्वरतर्फे नवरात्र विशेष सामाजिक उपक्रम
“सन्मान मानकरणीचा” सोहळ्यात गृहसेविकांचा गौरव – ४० प्रेशर कुकरांचे वितरण

प्रेषित गांधी,

महाबळेश्वर  प्रतिनिधी –

नवरात्रोत्सव हा शक्तीची उपासना आणि स्त्रीशक्तीचा गौरव करणारा सोहळा मानला जातो. त्याच धर्तीवर समाजातील उपेक्षित घटकांतील महिलांचा सन्मान करण्याचा उपक्रम “सन्मान मानकरणीचा” या नावाने राबविण्यात आला. व्ही. अन्वीतारा ट्रेनिंग सेंटरच्या संस्थापिका डॉ. सौ. सायली राणे वैद्य यांच्या पुढाकाराने आयोजित हा नवरात्र विशेष सोहळा दिनांक ०१ ऑक्टोबर रोजी पुणे येथे उत्साहात आणि सामाजिक जाणीव जपणाऱ्या वातावरणात पार पडला.

या कार्यक्रमाचे प्रमुख पाहुणे म्हणून मराठी रंगभूमी आणि चित्रपटसृष्टीतील नामवंत अभिनेत्री माधवी सोमण, अभिनेते मयूर खांडगे आणि अंजली जोगळेकर उपस्थित होते. विशेष म्हणजे, समाजात शांतपणे सेवा देणाऱ्या पण कधीच प्रकाशझोतात न येणाऱ्या गृहसेविका भगिनींचा विशेष सन्मान या कार्यक्रमाद्वारे करण्यात आला. त्यांच्या कष्टाचे महत्त्व ओळखत त्यांना सन्मानपत्र, उपहार आणि शुभेच्छा प्रदान करण्यात आल्या.

इनर व्हील क्लब ऑफ महाबळेश्वरचा उदंड सहभाग

या उपक्रमात इनर व्हील क्लब ऑफ महाबळेश्वर यांनीही सामाजिक बांधिलकी जपत मोलाचा सहभाग नोंदवला. क्लबतर्फे ४० प्रेशर कुकरांचे वितरण करण्यात आले. गृहसेविका आणि गरजू कुटुंबांच्या स्वयंपाकघरात उपयोगी ठरणारी ही मदत विशेष कौतुकास्पद ठरली. महिलांच्या सबलीकरणासाठी हातभार लावत त्यांच्या सन्मानाची भावना जपण्याचे कार्य इनर व्हील क्लबतर्फे करण्यात आले.

या प्रसंगी इनर व्हील क्लब ऑफ महाबळेश्वरच्या अध्यक्षा सौ. वर्षा संतोष पार्टे, पीडीसी रोहिणी वैद्य, सविता पल्लोड, रमा पल्लोड, नम्रता बोधे यांच्यासह अनेक मान्यवर उपस्थित होते. कार्यक्रमाचे सुयोग्य सूत्रसंचालन अन्विता वैद्य यांनी केले.

समाजासाठी प्रेरणादायी उपक्रम

कार्यक्रमात बोलताना डॉ. सौ. सायली राणे वैद्य यांनी सांगितले,
“गृहसेविका या प्रत्येक घराचा अविभाज्य भाग असतात. त्यांच्या योगदानाला योग्य मान मिळणे आवश्यक आहे. त्यांच्याप्रती कृतज्ञता व्यक्त करण्याचा हा आमचा छोटासा प्रयत्न आहे.”

प्रमुख पाहुण्यांनीही या उपक्रमाचे कौतुक करताना समाजात समानता, सन्मान आणि महिला सबलीकरणाचा संदेश देण्याची गरज अधोरेखित केली.

नवरात्राच्या पार्श्वभूमीवर पार पडलेल्या या उपक्रमाने नारीशक्ती, सामाजिक संवेदना आणि कृतज्ञतेचा संदेश समाजात पोहोचवला आहे. अशा उपक्रमांतून महिलांच्या सक्षमीकरणासाठी कार्य करणाऱ्या संस्थांना प्रोत्साहन मिळत असल्याचे मत उपस्थितांनी व्यक्त केले.

---

— "माझं गाव माझी बातमी" ✍️