आंबेनळी घाटात अपघात – वाहनधारकांचे चातुर्य आणि स्थानिकांच्या मदतीने मोठी दुर्घटना टळली
प्रतापगड प्रतिनिधी–
प्रसिद्ध आंबेनळी घाटात आज सकाळी एका वाहनाचा वेगावरील ताबा सुटल्याने अपघात झाला. महाबळेश्वरहून पोलादपूरच्या दिशेने जात असलेल्या एका टॅक्सीस महिंद्रा TUV वाहनाने जोरदार धडक दिली. हा अपघात पोलादपूर हद्दीतील कुंभळवणे जवळील वळणावर घडला. विशेष म्हणजे, मोठी दुर्घटना होण्याची शक्यता असताना सुदैवाने कोणतीही जीवितहानी झाली नाही.
प्राथमिक माहितीनुसार, महिंद्रा TUV वाहन चालकाला वळणाचा अंदाज न आल्याने वाहनावरील नियंत्रण सुटले व समोरील टॅक्सीस धडक बसली. धडकेत दोन्ही वाहनांचे नुकसान झाले असले तरी सर्व प्रवाशी सुरक्षित आहेत. स्थानिकांनी दिलेल्या माहितीनुसार, अपघाताच्या वेळी घाटात धुक्याचे प्रमाण कमी असले तरी रस्त्यावर दगड आणि वळणाचा तीक्ष्ण उतार असल्याने वाहनचालकाने नियंत्रण गमावले.
अपघाताची माहिती मिळताच परिसरातील नागरिक, पर्यटक वाहनचालक आणि घाटातील स्थानिक तरुण तत्काळ घटनास्थळी धावून गेले. धडक बसलेल्या वाहनांना रस्त्याच्या कडेला हलवून त्यांनी वाहतूक कोंडी टाळली. प्रशासनाकडून मदत मिळण्यापूर्वी काही काळ रस्ता बंद राहण्याची भीती होती; मात्र नागरिकांनी पुढाकार घेत वाहतूक सुरळीत केली.
दरम्यान, पोलिस प्रशासन अपघात स्थळी वेळेवर उपस्थित राहिले नाही, अशी स्थानिक नागरिकांनी नाराजी व्यक्त केली. "आंबेनळी घाट हा अपघातप्रवण क्षेत्र असूनही आपत्कालीन यंत्रणा तत्पर नसल्याचे या घटनेतून पुन्हा स्पष्ट झाले," अशी प्रतिक्रिया स्थानिकांनी दिली.
स्थानिकांच्या म्हणण्यानुसार, या घाटातील रस्त्यांची स्थिती सुधारणे, वळणाजवळ वेगमर्यादा फलक आणि इशारे वाढवणे तसेच ट्रॅफिक पेट्रोलिंगसाठी स्वतंत्र पथक नेमणे गरजेचे आहे. घाटातील अपघातांवर नियंत्रण मिळवण्यासाठी काटेकोर उपाययोजना करण्याची मागणी होत आहे.
दोन्ही वाहनधारकांकडून परस्परसंमतीने पंचनामा करण्याची प्रक्रिया सुरू असून, पुढील तपास पोलादपूर पोलीस करीत आहेत.
Comments
Post a Comment