रोटरी डिस्ट्रिक्ट 3131च्या डिजिटल सक्षमीकरण उपक्रमातून शिक्षकांचे भविष्य उज्वलकोयना एज्युकेशन सोसायटी तळदेव च्या ४१ शिक्षकांना आधुनिक तंत्रज्ञान प्रशिक्षणाचा लाभ
कोयना एज्युकेशन सोसायटी तळदेव च्या ४१ शिक्षकांना आधुनिक तंत्रज्ञान प्रशिक्षणाचा लाभ
जितेंद्र कारंडे,
प्रतापगड प्रतिनिधी :
शिक्षण क्षेत्रात डिजिटल क्रांतीला गती देत, रोटरी डिस्ट्रिक्ट 3131 ने “शिक्षकांसाठी डिजिटल सक्षमीकरण (Digital Empowerment for Teachers)” हा महत्त्वाकांक्षी उपक्रम सुरु केला आहे. या उपक्रमाचा उद्देश शिक्षकांना आधुनिक तंत्रज्ञानाशी सुसंगत करून त्यांच्या अध्यापन पद्धतीत सुधारणा घडवणे, शिक्षण अधिक परिणामकारक आणि आकर्षक बनवणे तसेच प्रशासकीय कामकाज सुलभ करणे हा आहे.
याप्रकारे, कोयना एज्युकेशन सोसायटी तळदेव येथील ९ शाळांमधील ४१ शिक्षकांना प्रशिक्षणासाठी “एमकेसीएल इरा लाईव्ह (MKCL Era Live)” हे डिजिटल ऍप देण्यात आले. बाजारात ₹2360 किमतीचे हे ऍप नि:शुल्क शिक्षकांना दिले गेले, ज्यामुळे शिक्षकांच्या डिजिटल सक्षमीकरणाला मोठी चालना मिळाली.
कार्यक्रमात रोटरी क्लब हडपसरचे अध्यक्ष आणि कोयना एज्युकेशन सोसायटीचे अध्यक्ष किसन जाधव, सचिव डी.के. जाधव, संचालक बी.व्ही. शेलार, तसेच धोंडीराम जंगम आणि इतर मान्यवर उपस्थित होते. या वेळी शिक्षकांचा विशेष सत्कारही करण्यात आला.
रोटरी डिस्ट्रिक्ट गव्हर्नर संतोष मराठे म्हणाले:
“शिक्षकांना तंत्रज्ञान आत्मसात करून त्यांचे अध्यापन अधिक परिणामकारक करता यावे, प्रशासकीय कामे सुलभ व्हावीत आणि विद्यार्थ्यांसाठी आधुनिक शिक्षण वातावरण निर्माण व्हावे, हा आमचा उद्देश आहे.”
याच उपक्रमाबाबत रोटरी क्लब हडपसरचे प्रतिनिधी अजय चौरसिया म्हणाले:
“गेल्या वर्षी आम्ही विद्यार्थ्यांसाठी ऍप दिले होते; यंदा शिक्षकांसाठी हे प्रशिक्षण ऍप देण्यात आले आहे. यामुळे दहावीच्या विद्यार्थ्यांचा निकाल आणि एकूण अध्यापनाची गुणवत्ता निश्चितच सुधारेल.”
हे प्रशिक्षण इंग्रजी आणि मराठी या दोन्ही भाषांमध्ये ऑनलाइन स्वरूपात दिले जाणार असून, शिक्षकांना २ महिन्यांसाठी २४ तास ऍपचा वापर करता येईल. प्रशिक्षणात टेक्नो पेडॅगॉजी, सायबर सुरक्षा, आजीवन शिक्षण, ऑनलाइन संदर्भ साधने आणि आर्टिफिशियल इंटेलिजन्सची मूलतत्त्वे यांचा समावेश आहे.
याद्वारे महाराष्ट्रातील शिक्षकांना डिजिटल साधनांचा प्रभावी वापर करून शिक्षण अधिक समृद्ध करण्याची संधी मिळणार असून, शिक्षक आणि विद्यार्थी दोघांनाही त्याचा मोठा लाभ होईल, अशी अपेक्षा व्यक्त करण्यात आली आहे.
कार्यक्रमात अध्यक्ष संभाजी काकडे, सचिव डॉ. अनुराधा जाधव तसेच रोटरी क्लब हडपसरचे प्रतिनिधी अजय चौरसिया उपस्थित होते.
Comments
Post a Comment