माजी विद्यार्थ्यांकडून शाळेला 30 हजार रुपयांची साऊंड सिस्टीम भेट; कुंभरोशी येथील श्री छत्रपती शिवाजी विद्यालयात प्रेरणादायी उपक्रम
जितेंद्र कारंडे
प्रतापगड प्रतिनिधी :
मागील महिन्यात एकत्र आलेल्या श्री छत्रपती शिवाजी विद्यालय, कुंभरोशी, ता. महाबळेश्वर येथील एसएससी (SSC) 2007-08 च्या माजी विद्यार्थ्यांनी आपल्या शाळेप्रती कृतज्ञता व्यक्त करत एक प्रेरणादायी उपक्रम राबवला आहे. जुन्या शालेय दिवसांच्या आठवणींना उजाळा देण्यासाठी आयोजित करण्यात आलेल्या 'गेट-टुगेदर' मध्ये या माजी विद्यार्थ्यांनी शाळेला काहीतरी उपयुक्त भेट देण्याचे निश्चित केले होते. त्यानुसार, आज या बॅचने शाळेला 30 हजार रुपये किमतीचा अत्याधुनिक साऊंड सिस्टीमचा सेट भेट म्हणून दिला आहे.
शाळेच्या प्रांगणात आयोजित करण्यात आलेल्या एका छोटेखानी कार्यक्रमात माजी विद्यार्थ्यांनी ही साऊंड सिस्टीम शाळेच्या व्यवस्थापनाकडे सुपूर्द केली. शाळेसाठी ही भेट अत्यंत उपयुक्त ठरणार आहे.
यावेळी बोलताना विद्यालयाचे मुख्याध्यापक अरुण मोजर यांनी माजी विद्यार्थ्यांचे मनापासून आभार व्यक्त केले. "आपल्या शाळेतून शिक्षण घेऊन गेलेले विद्यार्थी जेव्हा अशाप्रकारे शाळेच्या विकासासाठी योगदान देतात, तेव्हा ते इतर विद्यार्थ्यांसाठी एक मोठा आदर्श ठरतात. एसएससी 2007-08 च्या बॅचने दिलेली ही 30 हजार रुपयांची साऊंड सिस्टीम शाळेतील विविध कार्यक्रमांसाठी आणि शैक्षणिक उपक्रमांसाठी अत्यंत उपयुक्त ठरेल," असे मोजर म्हणाले. त्यांनी माजी विद्यार्थ्यांच्या या स्नेहपूर्ण आणि महत्त्वपूर्ण योगदानाचे कौतुक केले.
या उपक्रमामुळे शाळेच्या विद्यार्थ्यांमध्ये आणि शिक्षकांमध्ये उत्साहाचे वातावरण निर्माण झाले असून, माजी विद्यार्थ्यांचे शाळेप्रती असलेले प्रेम आणि आपुलकी दिसून आली. या भेटवस्तूमुळे शाळेच्या कारभारात नक्कीच भर पडणार आहे. माजी विद्यार्थ्यांच्या या सामाजिक बांधिलकीचे सर्वत्र अभिनंदन होत आहे.
Comments
Post a Comment